ДЮРДЬОВ – Маломатуранти дюрдьовскей Основней школи (ОШ) „Йован Йованович Змай” пияток вчер преславели свой матурски вечар. Осемрочне школованє закончели 73 школяре у штирох оддзелєньох, од хторих и єдно руске оддзелєнє у котрим було 7 школярох.
Преслава почала у школским дворе дзе маломатурантох дочекали родичи, родзина и товарише. Присутних привитала директорка ОШ Вукица Петрович котра вєдно зоз класнима старшинами уручела припознаня и дипломи найуспишнєйшим маломатурантом, а кнїжки им спред Општини Жабель уручела Нерима Шовлянски, членїца Општинскей ради задлужена за културу. Єдна спомедзи дзевецерих маломатурантох котри достали Вукову диплому и Єлена Мудри зоз руского оддзелєня. Того року нє вибрани школяр ґенерациї бо ше, як гварела директорка Петрович, анї єден мали матурант окреме нє видвоєл.
Пред маломатурским вечаром, котри и того року отримани у голу Школи, матуранти одтанцовали матурски танєц. Преслава тирвала до пол ноци, а на єденац годзин Школа за малих матуранох орґанизовала традицийни огньомет.
У руским оддзелєню основне школованє закончели три дзивки и штирме хлапци – Єлена Мудри, Марина Михальовски, Катарина Бесерминї, Владимир Горняк, Борис Хромиш, Иґор Салак и Иван Кухар, котри класней старшини Мариї Самарджич, наставнїци руского язика, и своєй учительки Єлени Салаґ подаровали пригодни дарунки.