РУСКИ КЕРЕСТУР – Всоботу, 13. мая, у Руским Керестуре треци раз одбавена комедия „Боинґ-Боинґ” Марка Камолетия, у режиї Владимира Надя Ачима, а у виводзеню Младежскей ґрупи Драмского студия „АРТ” рускокерестурского Дому култури. И на тото завод представа виволала жадани реакциї публики, котра их наградзовала з аплаузами на отвореней сцени.
У тей комедиї ситуациї ґлумя Себастиян Няради, Адриана Надь, Ребека Планчак, Андрей Орос, Марина Роман и Леонтина Штефанко, котри ище раз потвердзели свойо ґлумецки квалитети, схопносци и убавеносц на сцени.
Окрем спомнутих ґлумцох и режисера, у витвореню представи участвую и суфлерка Кристина Афич, костимоґрафка Таня Орос, тон-майстор Владимир Бесерменї, майстор шветла Желько Пашо и сценски роботнїк Дюра Хома.