Фото: В. Вуячич

Пред двома роками, Михайло Планкош зоз Суботици закончел режию и ґлуму на Новей академиї уметносцох у Беоґрадзе, а интересовала го ище єдна обласц, та тераз закончує и историю уметносци на беоґрадским Филозофским факултету. Любел би ше уписац на мастер студиї у обласци филма.

Михайло нє побановал же ше уписал на ище єден факултет, на хторим му остало положиц даскельо испити, и припознава же є задовольни же так поробел.

– Перши факултет сом закончел у класи Любишу Ристича, а званє хторе сом здобул то аудио-визуални уметнїк. Мой старши колеґа на тим факултету теди основал єден уметнїцки студио, НК, и там зме робели велї представи, бавели зме у Суботици, у Беоґрадзе на вецей местох, аж и у гарешту, цо було наисце интересантне. Як историчар уметносци годзен сом робиц свашта. Думам же можем комбиновац и єден и други фах, задовольни сом же сом вельо научел, у тим смислу же як швет функционовал скорей, як функционує тераз. История уметносци отворенша як сама история, самим тим же преучуєме визуалне, а нєшка воно досц актуалне, а ма вязи и з филмом. Шицко то кадриранє – толкує Михайло.

Вон визначує и же нєт дацо з тих обласцох цо би нє любел робиц, алє го тераз найбаржей интересує шицко цо повязане зоз шветом филма.

Фото: N Soul photography

– И на першим факултету сом ше трудзел занїмац ше зоз филмом и цо сом сам робел, робел сом у швеце филма. Правда, там сом ше вецей занїмал з театром, робел як ґлумец. Тераз ме интересує филм и режия у швеце филма, знїманє. Думам же то мож найлєпше вихасновац у нєшкайшим чаше, дзе маме мобилни телефони, компютери, конзумеризем медийох прейґ малих апаратох и же зґоднєйше прейґ того приповедац приповедки хтори можу буц хасновити и интересантни. До театру треба доцагнуц людзох же би пришли, треба предац карти же би ше заробело, путовац, виплациц салу, так же то у нєшкайшим чаше компликованше. Мам идею зняц и документарни филм о „Червеней ружи”, алє сом го ище нє поробел до конца – гвари вон и през шмих додава же му нєдавно оцец гварел же уж длуго студира и же пришол час же би почал хасновац алат хтори позберал, же би видзел цо може з нїм поробиц.

Єдного дня, Планкош би любел пойсц и до иножемства, же би ознова научел дацо нове.

– Думам же мудре пойсц зоз нашей жеми, нє зато же ту найгорше на швеце, алє думам же нормалне же би людзе одходзели док су млади, же би видзели як у других жемох, як ше там роби. Гоч нєшка мож видзиц вельо и прейґ интернету, нє исте то наисце пойсц, видзиц и почувствовац як там жиц и робиц. Потрудзиц ше врациц ше з тим искуством, алє чловек ше нє муши анї врациц, може вельо помогнуц дома и кед є даґдзе. Я нє гварим же бим ше нє врацел, нє гварим анї же бим ше врацел, гварим лєм же бим любел пойсц и научиц ознова дацо нове – припознава Михайло.

ЙОГО ФОТОҐРАФИЯ НА ВИСТАВИ У ФИРЕНЦИ

Попри шицким тим, Михайло ше од штреднєй школи занїма зоз фотоґрафию, а початком того лєта єдна його фотоґрафия завжала штварте место на вистави у уметнїцким студию у Фиренци.

– Моя пайташка там бива, та зна цо ше случує. Приявел сом ше, госци гласали о фотоґрафийох и освоєл сом тото, штварте место. То було други раз же сом там участвовал. Мал сом и даскельо самостойни вистави, а участвовал сом и на даскелїх ґрупних – бешедує Планкош.

Док бул у Суботици, бул активни и у вецей секцийох у Дружтве Руснацох.

– Одмалючка сом рецитовал по руски, ґлумел сом, шпивал у ґрупи, шицко под руководством Наташи Ґрунчич. Того року сом у Суботици рецитовал и на означованю Националного швета Руснацох. Думам же тото же сом ґлумел и шицко цо сом робел у Дружтве бул важни фактор у моїм живоце и за мойо опредзелєнє, алє, медзи иншим, и тото же ми мац професорка литератури, та сом и з обисца одходзел з интересованьом за филм, театер, до хторого ме родичи часто водзели. Бавел сом и у представох у ґимназиї, шпивал сом у хору Сербского културного центру Суботица, а у Беоґрадзе у хору „Иво Лоле Рибар” – начишлює на концу Михайло свойо богате искуство, а  треба повесц и же є язично наисце богати, бо з оцом и його фамелию бешедує по руски, а з мацеру, хтора по походзеню полу Бунєвка, полу Мадярка, дакеди бешедує по сербски, а дакеди по мадярски.