РУСКИ КЕРЕСТУР – Перша схадзка нового зволаня Совиту Месней заєднїци Руски Керестур отримана вовторок вечар, на нєй направене огляднуце на роботу Совиту у прешлим мандату, а вибрани и предсидатель Владимир Олеяр и його заменїк Тихомир Медич, котри тоти функциї окончовали и у прешлим мандату.
З єденац членох Совиту котри вигласани на виберанкох 8. юлия, спомедзи єденац кандидатох, схадзки присуствовали дзешецеро. Медзи нїма тройо котри були члени прешлого зволаня − Владимир Олеяр, Тихомир Медич и др Златана Надь. Нови члени Совиту то Михайло Фейди, Желько Папуґа, Михайло Пашо, Дюра Сабадош, Славко Бучко, Илона Зарубица, Єлена Сивч и Марина Преґун.
На предкладанє др Златани Надь, котре єдногласно потримане зоз явним гласаньом, за предсидателя Совиту вибрани Владимир Олеяр. За свойого заменїка Олеяр предложел Тихомира Медича.
Схадзки присуствовали и одборнїки у Скупштини општини Кула Мария Шепински и Владимир Варґа, як и директор ЯКП „Руском” Иґор Фейди, а то особи з котрима би, по словох Олеяра, Совит требал найцеснєйше сотрудзовац, понеже одборнїки у можлївосци представяц його плани локалней самоуправи у Кули, а ґу тому робота Совиту тиж цесно вязана зоз дїялносцу Рускому.
Олеяр на самим початку схадзки винєсол информациї о роботи Совиту у прешлим мандату, шицки штири роки були подзелєни дотациї здруженьом гражданом зоз самодоприносу, на два заводи ше чисцели ярки, поставяли ошвиценє и асфалтовало ше найкритичнєйши улїци, а попри тим предсидатель Совиту визначел ище даскельо инвестициї.
– Як зме пришли пред штирома роками перше зме отворели Спортску галу з помоцу локалней самоуправи у котрей тераз тренираю од 250 до 300 дзеци, поставени бехатон на автобускей станїци и у центру коло Дому култури. У амбуланти поставени цегелки и клими. На початку 2015. року зме поставели видео надпатранє у валалє, з котрим зме по словох милициї зменшали крадзи за коло 70 одсто, поробена фонтана у центру, сала за винчаня, а теди направени и проєкт терашнєй реконструкциї центру. На початку 2016. року положени нови столїки на пияцу и кров на амбуланти. У 2017. поробени проєкт фабрики води, а 2018. року ше роби реконструкция центру – виявел за Рутенпрес Олеяр.
За штиророчни мандат Совиту од 2014. по 2018. рок, МЗ участвовала як орґанизатор преслави Нового року, Кирбаю, „Червеней ружи” и других манифестацийох, роботних акцийох чисценя базену и на теметове. Дотациї и донациї здруженьом гражданом и установом кажди рок опредзельоване зоз самодоприносу, а на штирочним уровню вкупно роздзелєни 9 милиони 777 тисячи 937 динари. За инвестициї у валалє през тот час були опредзелєни 21 милион 205 тисячи 321 динари, а вкупно то нєполни 31 милион динари за штирочни мандат прешлого Совиту. Гоч ше и трошело зоз каси МЗ, ище вше остало єдна часц средствох зоз самодоприносу котри вицекол 2016. року.
– Самодоприносу уж два роки нєт, а на рахунку Месней заєднїци з приходох по тей основи остало ище 7 милиони динари, маме план же би ше тот пенєж унапямело за фабрику води. То би була учасц валалу, понеже керестурска фабрика по проєкту будзе коштац 58 милиони динари, а векшину средствох ше обчекує з уровня покраїнскей власци – толковал Олеяр
