БРИСЕЛ/РУСКИ КЕРЕСТУР – На тогорочоней Скупштини младих у Бриселу, у рамикох проєкту „Твоя Европа, Твой глас” з тему будучносци Европскей униї (ЕУ), представителє младих з 33-ох европских жемох придали три предкладаня Комитету за економско-социялни розвой, дознава Рутенпрес од учашнїци Скупштини – Дорис Бучко з Руского Керестура.
Спомнута Бучкова, та Ґавра Алексич и Вукашин Делич, школяре Штреднєй школи „Петро Кузмяк” з Руского Керестура як єдини представителє Сербиї 30. и 31. марца участвовали на Скупштини младих у Бриселу, вєдно зоз свою професорку анґлийского язика Лїляну Фина.
Млади после єднодньовей роботи по ґрупох вигласали три теми – проблеми тероризму, одруцаня поживи и врацанє довирия до ЕУ, хтори будзе розпатрац Комитет за економско-социялни розвой, як орґанизатор споомнутей скупштини.
