РУСКИ КЕРЕСТУР – На 50. Драмским мемориялу Петра Ризнича Дядї внєдзелю, 18. марца, ґлумец Владимир Балащак виведол монодраму „Кральова драга”, авторки и режисерки Лилияни Иванович, а у продукциї Шабацкого театру зоз Шабцу и Театра „Ирена Колесар” зоз Сримскей Митровици.
Зоз тоту монодраму, Балащак, професийни ґлумец, ище раз потвердзел же є праве тото. Прешвечлїво винєсол улогу остатнього югославянского краля Петра II Карадьордєвича, приповедку о його живоце, претаргнутим дзецинстве и наглим одрастаню.
О нєпорихтаносци за превельку одвичательносц хтора му припадла кед окончени атентат на його оца краля Александра I Карадьордєвича, о политичних бавискох, як и о одходу зоз своєй жеми, до хторей му познєйше було забранєне врациц ше, a цо му до конца живота було и найвекше жаданє.
На Мемориялє Балащакови було 20. виводзенє тей монодрами, чия премиєра була 2016. року на Кральовским дворе.
Монодрама „Кральова драга” настала на основи мемоарскей прози Краля Петра II Карадьордєвича, позбераней у кнїжки „Мой живот”, як и по записох даєдних историчарох, новинских статьох и ТВ емисийох.
Вецей фотоґрафиї мож поопатрац у нашей фотоґалериї.
