КУЛА/ВЕРБАС – Општина Кула од Управи за капитални укладаня АП Войводини достанє 67 милиони 642 966 динари, а Општина Вербас 12,9 милиони динари. Контракти о достованю спомнутих средствох, на основи конкурованя, штварток, 23. фебруара, з директорм Управи за капитални укладаня АП Войводини Недельком Ковачевичом у Покраїнскей влади подписали предсидатель Општини Кула Перица Видеканїч и предсидатель Дочасового орґану Општини Вербас Милан Ґлушац.
Општина Кула пенєж достала за вибудов нєдоставаюцей канализацийней мрежи у Кули и Червинки.
Општина Вербас 8,3 милиони динари достала за вибудов сиверного краку канализацийней мрежи у Вербаше (у населю Кудзеляра), 3 милиони за адаптованє санитарних ґузлох у ОШ „Светозар Милетич” у Вербаше и 1,6 милиони динари за купованє апарату за колпоскопию за Дом здравя „Велько Влахович”, тиж у Вербаше.
