БРАТИСЛАВА (СЛОВАЦКА) – Штредком марца у Братислави у Словацкей додзелєни ОТО награди за прешли рок, за найпопуларнєйших ґлумцох, водительох, шпивачох и музични ґрупи на телевизиї, подобни як у нашей жеми „Оскар популарносци”, а медзи наградзенима и Русини, лєбо особи походзеньом з местох у восточней Словацкей. Додзельованє наградох було у Словацким народним театру.
ОТО награду ше додзелює на основи анкети тижньовнїка „Плус 7 днї”, односно гласаня ТВ-патрачох, и у конкуренциї ґлумцох главну ОТО награду достал Михал Гудак, родом з Прешова, дакедишнї ґлумец у Театру Александра Духновича, а нєшка є у Словацкей позарядово популарна ТВ-особа – як ґлумец у рижних серийох, алє и як водитель и модератор ТВ-програмох и рижних „реалити”-емисийох.
У конкуренциї популарних шпивачкох ОТО награду достала Кристина (Пелак) зоз Свиднїку, котра наступала и на русинских фестивалох, насампредз на Русинским фестивалє у Свиднїку, а награду за найлєпшого спортского коментатора-водителя знова достал Прешовчан Марсел Мерчяк, котрого тамтейши медиї наволую и „кральом ТВ-спорту”.