Новини „Руске слово” потримали „Заєднїцку акцию процив медийней цмоти”

автор Борис ВАРҐА
978 Опатрене

Новини „Руске слово” ше приключели кампанї „Заєднїцка акция процив медийней цмоти!”, котру потримали вецей як 150 медиї и орґанизациї у Сербиї.

Тоту акцию за шлєбоду медийох порушали уплївовни медиї и новинарски здруженя, а повод було нєдавне заверанє новинох „Враньске”, єдних з наймоцнєйших локалних медийох зоз Враня.

Новинаре и медийни здруженя у Сербиї уж длугши час пробую обрациц увагу явносци на константне потупйованє медийних шлєбодох. Уж єден час у нашей жеми исную рижни прициски на медиї, на локалним и националним уровню. Новинаре и медиї оставаю без средствох, траца роботни места, а странки на власци директно по менох увредзую и преволую новинарох.

Процив медийох ше водза котроверзни судски поступки.

Же шлєбода медийох у Сербиї нєшка вельо горша як прешлих рокох шведоча и виглєдованя медзинародних орґанизацийох, як цо то „Репортере без гранїцох” и „Фридом хаус”.

Прето новини „Руске слово”, котри тиж локални як и „Враньске”, потримую своїх колеґох же би ше им обезпечело єднаки условия на тарґовищу и єднаки приступ средством. Же би ше власц нє мишала до їх роботи, а окреме локални бизнис и полтични авторитети.

Шлєбода медийох то єден зоз важнєйших факторох демократиї, а без шлєбоди слова Сербия нє годна постац членїца ЕУ.

ПОВЯЗАНИ ТЕКСТИ