Нови и ушорени стари направи за бавенє

автор сас
1k Опатрене

У часци парку у Дюрдьове дзе ше находза рижни направи за дзеци за бавенє, дзекуюци донацийом дюрдьовских парастох, почало поставянє нових направох и ушорйованє старих.

Дюрдьовске Здруженє „Парастске шерцо” сноване на инициятиву младих парастох з Дюрдьова, котри жадали ушориц и помогнуц свойому валалу. Прето по снованю Здруженя, прешлого року пред тлачидбу жита о акциї збераня донацийох у зарну, гражданох информовали на плакатох котри були полїпени на шицких одкупних местох за житарки.

На тих местох и далєй мож донировац жито, сою, або кукурицу. Потераз помогли Содари „Филипус” у Шайкашу у котрей робя особи з инвалидитетом. Им донировали вибалировану сойову сламу з 10 гектарох зоз котру ше зогрива просториї, та огрив мали за цалу остатню, прешлу сезону.

Того року Здруженє ма у плану дакому донировац бали з 12 гектарох, а кед же будзе як планую, бали слами будзе зоз ище 10 гектарох.

ДОНАЦИЇ ДАЛИ КОЛО 60 ОСОБИ

По тот мешац донациї дали, або помогли у орґанизациї, медзи пейдзешат и шейдзешат людзе, а найвекша донация єдного параста була тона жита. Другу акцию по шоре ше ище вше запровадзує, ушорює ше дзецински парк у Дюрдьове.

У тим им помогла општинска Служба за урбанизем, маєтни, квартельни-комунални роботи и транспорт. Поставена єдна нова велька направа зоз ґарадичами за пендранє з трох часцох, три гомбалки, алє и нови древени часци на старих направох котри углавним поламани, або були очкодовани – шедзиска на даскелїх гомбалкох, оґрада на направох и часци на лавочкох за старших. Завжате становиско же треба помогнуц людзом котрим вона потребна и ушориц Дюрдьов.

– У орґанизациї участвую млади валалчанє, вєдно ше радзиме и предкладаме цо би требало, або кому би требало помогнуц. Бешедовали зме и же би було добре зберац шмати або желєняву и подаровац особом котрим є потребна. Єдино нам хиби поростория дзе бизме таке могли одкладац и дзе бизме могли приходзиц, ґу шицким котрим зме потребни – гварел єден з активнєйши членох Здруженя „Парастске шерцо” Боян Якешевич.

ГРАЖДАНЄ СЦУ ПОМОГНУЦ

Перше до чого жадали уложиц средства, було закончиц поставянє огради опрез будинку Рускей школи, алє им у Општини гварене же за тото уж иснує проєкт до котрого вони планую укладац. Док ше поробя шицки роботи у парку, котри уж при концу, у планє валалскей Дзецинскей заградки „Дюрдєвак” подаровац два гомбалки котри им, як им воспитачки гварели, потребни.

– Прешлого року бул добри урожай, та велї валалчанє були донаторе, а до акциї ше жадаю уключиц и гражданє зоз Жаблю. Того року нє обчекуєме вельо донациї, бо пре сушу єст менєй урожаю, алє важне визначиц же єст гражданох котри жадаю дзечнє помогнуц – гварел активнєйши члени здруженя Иван Ресанович.

КАМЕРИ И ОШВИЦЕНЄ ЗА БЕЗПЕЧНОСЦ

Гоч нє маю информацию о роду и количестве житаркох, донатором нови идеї нє хибя. Прето представительом Управи општини Жабель предложели же би поставели камери и лєпше ошвиценє у дзецинским парку, дзе поставени направи за бавенє, бо их годни, як и у пракси доказане, швидко знїщиц нєцивилизовани особи. 

Донирац мож на шицких одкупних местох у Дюрдьове, а за вецей информациї мож поволац на число Здруженя 062/89-70-118.

Активнєйши члени Здруженя, Иван Ресанович и Боян Якешевич

Активнєйши члени Здруженя, Иван Ресанович и Боян Якешевич

ПОВЯЗАНИ ТЕКСТИ