РУСКИ КЕРЕСТУР – У Руским Керестуре 19. мая першираз отримана манифестация „Ноц музейох” хтора ше тей ноци отримує ширцом швета и у велїх местох и городох Сербиї.
Туристичне здруженє Руски Керестур на чолє з предсидательку Любицу Няради зоз своїма партнерами того вечара од 18 по 23 годзин орґанизовало даскельо змисти у будинку Замок, дзе змесцена и Музейна збирка хтору у тим чаше нащивели велї Керестурци.
З тей нагоди була пририхтана и вистава старих образох, а найвецей поваги було пошвецено наймладшим Керестурцом. Музична секция предшколцох з керестурскей Дзецинскей заградки „Цицибан” ПУ „Бамби” виведла три руски шпиванки, а пририхтала их Татяна Фейди.
Потим за велї дзеци з „Цицибану” вихователька Емилия Костич з асистентками отримала роботню на хторей дзеци правели покераї и вифарбйовали народне облєчиво, а потим велї, нє лєм дзеци алє и старши школярки, вихасновали нагоду облєчиц ше и висликовац у народним облєчиве хторе було пририхтане.
Доприношенє манифестациї дало и Здруженє женох „Байка” хторе порихтало предавацку виставу сувенирох и стародавни єдла як закуску за нащивительох хторих було у красним чишлє.