НОВИ САД – У рамикох манифестациї Днї України, на сцени „Йован Дьордєвич” у Сербским народним театру вчера, 22. мая, отримани Концерт музичней и хорскей уметносци наволани „Україна вита госцох”.
Госцох привитал и концерт отворел амбасадор України у Сербиї Олександер Александрович, котри визначел же на тим концерту будзе представена заєднїцка славянска култура.
У богатей програми составеней з 18 точкох, у двох часцох наступели хори и шпивацки ґрупи – Хор „Пасторала” зоз Жаблю, Мишани Хор Дому култури и Катедралней церкви св.о. Миколая з Руского Керестура, КУД „Иван Сенюк” з Кули, КПД „Карпати” з Вербасу, ДНУК „Коломейка” зоз Сримскей Митровици, УКУД „Калина” з Индїї, Хор „Гармония” з Нового Саду и шпиваче УКЦ „Кобзар” з Нового Саду, а почесни госци були члени Ансамблу Львовскей филгармониї „Високи замок”.