Отримани школски вечари поезиї

автор наг/зам
1k Опатрене

ГОРВАТСКА – З нагоди 21. фебруара, Медзинародного дня мацеринского язика, од 20. по 24. фебруар у Старих Янковцох, Петровцох и Вуковаре у Горватскей отримани Школски вечари рускей поезиї, а того року були пошвецени творчосци Томислава Мишира, родом з Вуковару.

Пияти Школски вечар рускей поезиї у Старих Янковцох отримани 20. фебруара, а програму, зоз свою учительку Илону Грецешин, пририхтали школяре од першей по осму класу ОШ котри у тим месце ходза на наставу руского язика, пооблекани до народного облєчива.

Литературна програма була преткана з рускима народнима шпиванками, а госц бул поета Томислав Мишир.

Подобни програми, односно школски вечари рускей поезиї у Петровцох отримани 22., а у Вуковаре 24. фебруара.

Попри школох, соорґанизаторе школских вечарох поезиї у Старих Янковцох, Петровцох и Вуковаре були локална самоуправа, родичи дзецох и Дружтво „Руснак” з Петровцох, а у Вуковаре и Рада рускей националней меншини Городу Вуковар.

ПОВЯЗАНИ ТЕКСТИ