НОВИ САД – Покраїнски секретарият за польопривреду, водопривреду и лєсарство розписал конкурс за додзельованє безповратних средствох за преробок овоци, желєняви (и печаркох), грозна, продукцию вина и моцних алкоголних напойох у Войводини у тим року. Конкурс отворени покля єст средства, заключно з 10. септембром того року.
На конкурсу буду додзелєни 50 милиони динари, як безповратни средства, а поєдинєц може достац найвецей 2 милиони динари, односно 2,2 милиони кед подношитель прияви жена, або особа младша од 40 роки, односно, кед же ше инвестиция реализує на подручу з очежанима условиями роботи у польопривреди.
Предмет конкурсу додзельованє средствох за нову опрему за сушенє, змарзованє, бланшированє, пастеризацию, стерилизацию продуктох з овоцови и желєняви, за опрему за продукцию вина и моцних алкоголних напойох и опрему за приманє, преробок, полнєнє и пакованє продуктох з овоци, желєняви, грозна, вина и моцних алкоголних напойох. Право на субвенцию маю физични и правни особи уписани до Реґистру польопривредних ґаздовствох.
Привредне дружтво може витвориц право на стимулацию лєм кед є ґруповане до микро, або малого правного лїца, а землєдїлски задруґи кед су ґруповани до микро, малого, штреднього и велького правного лїца, у складзе зоз законом з хторим ше ушорює рахунководство.