Представени Каритасов проєкт о зменшованю ризику од елементарних нєпогодох

автор мгк
1.1k Опатрене

НОВИ САД – Проєкт Каритасу Сербиї „Зменшованє ризику од елементарних нєпогодох” вчера, 30. марца, представени на конференциї за новинарох у Новим Садзе. У мено националного Каритасу о проєкту бешедовал Петар Кос, потим фаховец з обласци цивилнєй защити мр Йована Лончаревич, як и координатор приєкту у Апостолским еґзархату за грекокатолїкох у Сербиї Елемир Джуджар.

Як поведзене, науково студиї утвердзели нєдвосмислову вязу медзи укладанями  до зменшованя ризику од елементарних нєпогодох и отримуюцим розвойом и общим напредованьом дружтва, а Каритас ше успишно уключел до тих процесох и по тим питаню запровадзел добре сотруднїцтво з орґанизациями на локалним и ширшим подручу. До того уключел и Канцеларию за явни укладаня Влади Републики Сербиї, Сектор за позарядово ситуациї МУП Сербиї, як и владически каритаси у Сербиї.

З проєктом ше жада подзвигнуц свидомосц о проблему и превентивно дїйствовац, а Елемир Джуджар подробнєйше бешедовал и о сотруднїцтве з локалнима самоуправами Нови Сад, Вербас, Суботица, Србобран, Шид и Мали Идьош.

Наведол же у проєкту анґажовани 25 основни школи, посадзени 25 000 древка (як защитни паси) у општинох Вербас и Србобран, а запровадзени и вецей еколоґийни акциї у Коцуре, вєдно з Месну заєднїцу, Школу, Добродзечним огньогасним дружтвом и Здруженьом младих.

ПОВЯЗАНИ ТЕКСТИ