КОЦУР – З нагоди Шветового дня водох вчера, 22. марца, у коцурскей ОШ „Братство єдинство“ школяром штвартей класи фаховци з ЯКП „Комуналєц“ з Вербасу отримали преподаванє о значносци, чуваню и шпорованю води у каждодньовим живоце.
Фаховци визначели важносц чуваня и нєзаґадзованя води, за цо ше ю шицко хаснує, прецо є важна за здравє и прецо ю, окрем з еко-чопох, дошлєбодзене пиц и з водоводу у обисцох, понеже и тота вода здравствено безпечна.
Тиж так, презентере школяром бешедовали и о важносци и способох шпорованя води, а бул приказани и кратки филм о спомнутей теми.
Школяром найинтересантнєйши бул експеримент у хторим видзели як ше бере прикладнїк и як випатра сама анализа води з хтору ше утвердзує єй здравствена безпечносц за пице и хаснованє у обисцу.
