РУСКИ КЕРЕСТУР – Совит Месней заєднїци (МЗ) Руски Керестур вчера, з дзевец гласами „за” и двома „стриманима”, прилапел финансийни план за 2017. рок, по хторим за роботу МЗ будзе розполагац зоз 4 милиони 16 000 динари.
З буджету Општини Кула Руски Керестур достава 3 милиони 716 000 динари, а Керестур того року по проєкту достанє и 300 000 динари за орґанизованє змистох за Кирбай.
Заплановани и инвестициї вредносци 12 милиони 200 000 динари, хтори обезпечени з месного самодоприносу, а хтори буду витворени прейґ Општини. Найвекше укладанє будзе 6 милиони и 300 000 динари за виробок проєкту за фабрику води и за конкурованє за средства до Покраїни, а учасц з дотераз нєутрошених средствох зоз самодоприносу у тим 3 милиони динари.
У тим року ше будзе асфалтовац два критични улїци на Новим населєню, за цо опредзелєни 3 милиони динари, милион динари наменєни за чисценє атмосферских яркох, а милион 900 000 динари зоз самодоприносу за дотациї у спорту, култури, образованю, социялней защити и здруженьом гражданох.
У тим року з дотацийох найвецей наменєне спорту, так же спортски клуби „Русину” достаню вєдно 730 000 динари. За Фестивал рускей култури „Червена ружа” Дом култури Руски Керестур достанє 400 000 динари, а здруженя хтори спадаю до обласци туристичней промоциї Руского Керестура достаню вєдно 260 000 динари.
У обласци образованя Месна заєднїца того року обезпечи 120 000 динари за керестурскей Оддзелєнє Предшколскей установи „Бамби”, а за обласц социялней защити вєдно 310 000 динари.
