НОВИ САД – Ревиялна часц 28. Фестивалу новей народней шпиванки „Ружова заградка” була пошвецена Михайлови Зазулякови, авторови коло 50 текстох за дзецински, народни и композициї у забавном духу котри виведзени на наших фестивалох – „Червених пупчох”, „Червених ружох” и на „Ружових заградкох”, а за велї нїх Михайло Зазуляк бул и наградзовани.
И попри тим же бул познатши по текстох на забавни мелос, на тогорочней „Заградки” Ивана Дудаш присутних здогадла на тексти хтори Зазуляк написал за народни шпиванки.
Шпиванку „На розлуку” Зазуляк написал давного 1993. року, компоновал ю Юлиян Рамач Чамо, а вчера вечар ю интерпретовал Борис Маґоч. Исти тамдем авторох кед слово о тексту и музики бул и у композициї „Мам гунцута”, хтору на Фестивалу одшпивала Ана Римар, а Зульов текст и Чамова музика познати и у шпиванки „Паприґарска”, хтору виведол Мирослав Малацко.
Лїляна Барна Никитович на „Ружовей заградки” одшпивала композицию „За другого пойдзем”, дзе на Зульово слова Мирон Сивч зложел музику.
Остатнї два шпиванки у ревиялней часци Фестивала були як и перши – на Михалов текст, а Чамову музику. Композицию „Ноцни шпиванки” одшпивал Йовґен Надь, а „Єшеньски нємири” Мирослава Даждиу. Остатня виведзена у конкуренциї забавних на „Червеней ружи” 1993. року, а за тамбурови оркестер ю присподобел Мирослав Пап.
Шпивачох провадзел Мали состав тамбурового оркестра Радио телевизиї Войводини под управу Данила Нинковича.
