РУСКИ КЕРЕСТУР – Програма на Туристично-привредно-културней манифестациї „Днї керестурскей паприґи” традицийно богата, и кажди рок интересантнєйша. Так и того року – бул орґанизовани маскенбал за дзеци, вибор за найкрасши штанд и змаганє за найчежшу паприґу, а були понукнути и числени варени єдла.
Медзи численима дзецми, под нєпрепознатлївима масками, перши награди достали штиророчна Андрейка Рац и седемрочни Стефан Настасич. У жирию котри виберал побиднїкох були троме госци, а медзи нїма Кароль Валка, котри и додзелєл коверти з наградами.
У катеґориї вибору за найкрасши, медзи численима штандами, першу награду освоєл паприґар Микола Винаї, на чиїм штанду два дзивчата облєчени до паприґох предавали мелку паприґу и понукали хлєб намасцени з масцу и посипани з паприґу. Наградзени достал слункобран.
Михал Чизмар Рус тогорочни горди побиднїк з найчежшу паприґу, котра на мажочки зважела 404 ґрами. З тей нагоди Здруженє керестурских паприґарох „Капсикум анум” му подаровало мажу за меранє.
Под час тирваня манифестациї, за госцох були приготовени рижни єдла у петнац котлох, и осем печени прашата и баранчата на рожньох.
По законченю провадзацих змистох, наступели „Пицикато бенд” у составе Саня Дивлякович, Кристиян Няради и Мирон Сивч.