КУЛА − У рамикох 25. културней манифестациї „Костельникова єшень” всоботу, 10. новембра у Кули отримане Стретнуце рецитаторох „Михайло Зазуляк” на котрим ше представели рецитаторе по руски з вецей наших штредкох.
Шпивацка ґрупа РКУД „Др Гавриїл Костельник” наступела зоз трома писнями, а Стретнуце традицийно отворене зоз шпиванку, Костельникову писню „Бачко моя, Бачко”. Потим ше представели рецитаторе у трох ґрупох – дванацецеро у младшим возросту од першей по штварту класу основней школи, єденацецеро у штреднїм возросту од пиятей по осму класу основней школи, и двойо рецитаторе у старшим возросту.
Попри тим, домашнї за своїх госцох пририхтали виставу дарункох котри принєсли дому зоз рижих госцованьох, як и предметох котри означели розвой РКУД „Др Гавриїл Костельник” цо єден зоз способох як чуваю и пестую руску културу.
Стретнуце рецитаторох од того року у своєй назви будзе ношиц мено покойного Михайла Зазуляка котри цалу кариєру, медзи иншим пошвецел и рецитованю, перше як рецитатор, потим як фахови руководитель, и як консултант за руски язик на смотрох висшого уровню.
Стретнуце отримане у Основней школи „Петефи бриґада”, а нєпоштредни орґанизатор и домашнї му бул РКУД „Др Гавриїл Костельник”.
