ВЕРБАС – Всоботу, 14. октобра, на Площи Николи Пашича у Вербаше у орґанизациї Пчоларского здруженя „Вербас” отримани 6. Фестивал меду и продуктох зоз меду котри позберал красне число нащивительох.
Пчоларски продукти на Площи виложели 12 пчоларе зоз Вербасу и околїска. Окрем меду, нащивителє могли купиц и други продукти як цо то прополис, полен, мед у сачу, восок, палєнки – медовачу и ореховачу.
Окрем предайней часци, у рамикох Фестивалу була и програма на котрей участвовали Городска фолклорна ґрупа, Дзецинска фолклорна ґрупа КПД „Карпати“, дзеци зоз вербаскей дзецинскей заградки „Бошко Буха“ и рецитаторе зоз Културного центру Вербас.
Тиж так, за пчоларох було орґанизоване преподаванє и промоция кнїжки. У Народней библиотеки „Данило Киш“ прим. др Видоє Кулич отримал преподаванє о лїковитих прикметох меду и продуктох зоз меду, а представел и свою кнїжку „Пчоли нас кармя и лїча“.
