Числени вирни у процесиї и на Служби Божей у Водици

автор мст
900 Опатрене

РУСКИ КЕРЕСТУР – Керестурска парохия вчера преславела Други дзень Сошествия Св. Духа – Русадля. Богослуженя були у церкви на 8 и 10 годзин, а вечарша Служба Божа на 19 годзин у Водици.

Традицийна Процесия зоз крижами до Водици рушела на 17 годзин зоз церковней порти, а предводзели ю керестурски капеланє о. Владимир Медєши и о. Михайло Шанта. Того року у процесиї було надосц вирних – коло 50, медзи хторима були шестри Служебнїци хтори предводзели модлєнє Ружанцу и шпиванє писньох Богородици.

Вельо вирних було и на Служби Божей хтору предводзел коцурски парох о. Владислав Рац, сослужели домашнї капелан о. Владимир Медєши и госци зоз Словацкей – дакедишнї керестурски капелан о. Радован Андрейко и римокатолїцки священїки о. Павел Камински, а споведали домашнї священїки – парох о. Михайло Малацко и капелан о. Михайло Шанта.

У своєй казанї о. Андрейко, медзи иншим, здогаднул же Водица то одпустове место хторе Пресвята Богородица вибрала пред вецей як 150 роками же би ту примала нашо трапези и молби и давала свойо ласки. На концу Богослуженя бул Молебен до Богородици и мированє.

ПОВЯЗАНИ ТЕКСТИ