РУСКИ КЕРЕСТУР – Кандидатка Хелена Пашо Павлович спомедзи трох кандидаткох за директора Основней и штреднєй школи зоз домом школярох „Петро Кузмяк” достала потримовку на схадзки Школского одбору хтора вчера отримана у просторийох Школи. Їх предкладанє будзе послате министрови просвити на конєчну одлуку о директорови.
Дзевецчлени Школски одбор Пашо Павловичовей, котра була и потерашня директорка, з тайним гласаньом дал осем гласи док кандидатка Саня Тиркайла достала єден глас, а анї єден кандидатка Любица Няради.
Хелена Пашо Павлович, попри потримовки Школского одбору, перше достала потримовку колектива Школи на схадзки Наставнїцкей ради дзе достала 48,19 одсто од числа занятих, Саня Тиркайла достала 31,32 одсто, а Любица Няради 16,06 одсто од членох колективу.
Позитивне думанє шицки три кандидатки за функцию директора достали тих дньох и од Националного совиту рускей националенй меншини цо законска обовязка прето же керестурска Школа од окремного значеня за руску заєднїцу.
Як поведзене на схадзки Школского одбору, їх предкладанє же би за директора Школи була вибрана Хелена Пашо Павлович будзе послате до Покраїнского секретарияту за образованє, предписаня, управу и национални меншини-национални заєднїци, а отамаль до Министерства просвити, науки и технолоґийного розвою чий министер ма принєсц конєчну одлуку у чаше од 30 дньох.