РУСКИ КЕРЕСТУР – У Руским Керестуре на ютре, 18. марца, почина тогорочни, уж 49. Драмски мемориял Петра Ризнича Дядї, а тирва по 26. марец. Мемориял почнє з отвераньом вистави подобових роботох у енкаустики Сонї Папуґа Андєлич, а потим и премиєрним виведзеньом представи „Зазбероваче труплох” Звонимира Павловича, у режиї Михайла Зазуляка и Славка Ороса, а у виводзеню нашого националного Руского народного театру „Петро Ризнич Дядя”.
Спомнута вистава подобових роботох будзе поставена у голу Дому култури, а єй отверанє на ютре будзе на 19 годзин.
Перши викенд на Мемориялє будзе вивезена лєм спомнута представа РНТ, а у тижню, буду одбавени три дзецински представи – на вовторок, 21. марца представа Руского КУД „Др „Гавриїл Костельник” з Кули; на стреду, 22. марца госцуюца представа КУД „Иван Сенюк” з Кули, а на штварток и пияток, 23. и 24. марца представа Драмского студия „АРТ” керестурского Дому култури. Представа Керестурцох будзе бавена два раз, понеже ю приду патриц и школяре з наших местох, у орґанизациї Одбору за образованє Националного совиту Руснацох, а єдна часц школярох з наших местох придзе патриц и представу Кулянцох.
Виводзенє представох за старших на Мемориялє будзе предлужене од штвартку, 23. марца, кеди госцую драмски аматере з КУД „Яким Гарди” з Петровцох, з Горватскей, Ютредзень з младежску представу наступя домашнї з Драмского студия „АРТ” керестурского Дому култури, на соботу, 25. марца, госцує ансамбл „Театру при фонтани” з Михаловцох зоз Словацкей, а Мемориял на нєдзелю, 26. марца завре представа по сербски Театру „Стеван Сремац” з Червинки.
Шицки представи буду виведзени у Велькей сали Дому култури, представи за дзеци починаю на 12,30, а за старших на 19,30 годзин.
Драмски мемориял Петра Ризнича Дядї ше отримує з финансийну потримовку Министерства култури и информованя Републики Сербиї, Покраїнского секретарияту за културу, явне информованє и одношеня з вирскима заєднїцами, Покраїнского секретарияту за образованє, предписаня, управу и национални меншини-национални заєднїци, Општини Кула и Националного совиту Руснацох.