Текст хтори тераз читаце ми вироятно було найчежше и найкомпликованше написац одкеди пишем, понеже мам тельо дилеми, процивни становиска у глави и огранїченя хтори пошлїдок факту же то нє мойо новини и тиж так факту же жиєм ту, а нє даґдзе там и так далєй.
Шором. Одкеди знам за себе, знам и за Косово. Ище кед сом бул мали, кед сом ходзел до основней школи, а то наисце було давно, здогадуєм ше же ше з часу на час прешмикла даяка вистка о проблемох у братстве, розпукнуцох у єдинстве на КиМ и же Албанци нє сцу остац у тей и такей держави. Як цо нє сцели анї Словенци, Горвати и так далєй. Пришли войни, Косово ше нє ришовало, як цо ше нє ришовало вик и кусур назадок и нормално же експлодирало. Бомбардованє, траценє суверенитета и вец конєчно пременка 2000. року. Наисце сом наївно верел же под час Дїндїча питанє КиМ будзе даяк ришене, же тот баласт на даяки способ одпаднє и очиглядно сом нє мал право. Пришол ДСС и партнере, ту уж було ясне же КиМ ознова идзе под тепих, алє вец знова пришол ДС. Югу, проевропска коалиция, кущик гражданскейша опция од предходней власци, алє сом ше наздавал, нє знам чом, же уж риша тото питанє. Е, шипак. Косово шерцо Србиї и так далєй. А вец пришли напредняки. Е, ту сом бул сиґурни же од ришованя питаня КиМ нєт нїч. ДС ше предлужел у своїм маниру розпадовац и, у „найлєпшей” традициї тей странки, хто як страцел виберанки у странки, формовал нову партию док ше нє зведли на тото цо су тераз. Особнє верим же ше то случи и напредняком єдного дня, алє то тераз нє тема, понеже СНС достал розришени руки же би владал як сце и дзе сце. Опозиция така яка є, контрастановиско лєдво же мож даґдзе чуц, а и кед го чуєме, то найчастейшеː а) стара приповедка хтора нє пиє воду, лєбо б) лєм най є контра од СНС-а.
А власц як власц, робела тото цо и скоро кажда пред ню на тим просторе, мали декларативну потримовку и на востоку и на заходу и тото балансованє им досц добре ишло, док нє пукло у України. Теди ше даскельо людзе порадзели же досц „завитлаваняˮ и же тота приповедка зоз КиМ муши буц закончена. Позберали екипу зоз Балкану, питали ше хто цо сце, гварели и єдним и другим цо вони сцу и цо ше случи кед то нє будзе поробене и „на сполньованє, вольно”.
И тераз маме єден абсолутни абсурд, парадокс, процивну шицким квотом, ситуацию. ОК, наївни сом як лабрадор, алє випада же гевти за хторих сом нїґда нє верел же то поробя, риша конєчно тот ґузел КиМ, а проевропски странки предлужую ше шлїзкац на право и ставаю на бранїк интеґритета и суверенитета, без огляду на цену. И видзице тераз чом ми так чежко написац текст и остац нєпристрасни, а повесц становиско, пущиц илузиї же могло буц иншак и прилапиц же ми нє важне вецей хто и як риши питанє КиМ. Лєм най го риша и най положиме на тото точку уж раз. Вец зме ше, озда, годни врациц на стандардни теми – лопов, мафияш, националиста, гулиґан и подобне. Боже мили, кельо ми далєко од тей Европи о хторей тельо шнїєме.