З промоцию кнїжкох у Школи и вечаршу централну програму нєшка почина „Костельникова єшень”

автор зам
933 Опатрене

РУСКИ КЕРЕСТУР – У знаку 130-рочнїци народзеня зачатнїка нашей уметнїцкей литератури и кодификатора язика Руснацох на тих просторох, нєшка, 18. новембра почина тогорочна, уж 23. Културна манифестация „Костельникова єшень” (КМ КЄ) и у вецей местох – Руским Керестуре, Дюрдьове, Кули и Коцуре тирва по 26. новембер.

КМ КЄ нєшка почнє на 11,30 г. у рускокерестурскей Школи „Петро Кузмяк” з представяньом нових кнїжкох за дзеци – „Котульки и ґомбульки” Ирини Гарди Ковачевич и „Гайзибан на шпарґу” Меланиї Римар школяром нїзших класох ОШ, на 12,15 г. штредньошколцом буду представени кнїжки историйного змисту – „На крижней драги” др Янка Рамача и „Мадярска Горнїца” Мирона Жироша, а на 13 г. школяром висших класох спомнути и кнїжка „Злагода” Серафини Макаї.

У керестурским Ресторанє „Червена ружа” на 18,30 г. будзе промоция нових кнїжкох у виданю НВУ „Руске слово” и стретнуце з писателями. Акцент будзе на промоциї кнїжкох „Безсони ланцущок” Славици Шовш, „Шантовки” Миколу Шанти, „Сучасна українска драма” Надїї Мирошниченко и др Людмили Попович, „Слявянски язик – родзенє и живот мертвого язика” др Любомира Белея.

Госц на централней програми на КЄ нєшка на вечар будзе сербски поета, прекладатель, есеїста, професор др Зоран Дєрич (тераз о.д. директора Сербского народного театру у Новим Садзе), а у Школи и на вечар у музичней часци участвую Танита Ходак и Сашо Палєнкаш, котри наступя и у других местох дзе буду представяни нови кнїжки.

1-KJ-02

По програми у Ресторанє, у голу Дому култури будзе отворена вистава „Приватни живот Руснацох” автора Сашу Сабадоша и Заводу за културу войводянских Руснацох.

На соботу, 19. новембра, у ОШ „Петефи бриґада” у Кули на 15 г. будзе традицийне Стретнуце рецитаторох, а на нєдзелю, 20. новембра, у Дюрдьове на 18 г. буду представени кнїжки „На крижней драги” др Янка Рамача и „Мадярска Горнїца” Мирона Жироша.

У Коцуре у рамикох КЄ буду два програми – на вовторок, 22. новембра, у Доме култури на 18 г., у орґанизациї Дому култури, Етно-клубу „Одняте од забуца” и Месного одбору Рускей матки будзе вистава подобових роботох з тему „70-рочнїца колонизациї” и Литературно-музични вечар, а на штварток, 24. новембра на 12 г. у ОШ „Братство єдинство” буду представени нови кнїжки за дзеци.

Културна манифестация на соботу, 26. новембра будзе закончена у Велькей сали Дому култури Руски Керестур з мултимедиялну манифестацию младих „Дньовка”, на 21 г., а пред тим, на 20 г. у голу Дому култури будзе отворена вистава фотоґрафийох з тогорочного конкурсу Младежскей орґанизациї „Пакт Рутенорум” з тему „Бунт”. У голу будзе виложена и спомнута вистава Сабадоша и Заводу.

И тогорочну „Костельникову єшень” орґанизує Дом култури Руски Керестуре, у сотруднїцтве з керестурску Школу „Петро Кузмяк”, НВУ „Руске слово” и дружтвами и здруженями по наших местох.

1-KJ-03

ПОВЯЗАНИ ТЕКСТИ