Треца манифестация „Литературиюм” на тему „Звонка рамикох”, отримана у Руским културним центру (РКЦ), у Новим Садзе, пияток 27. новембра того року.
Програма отворена з виставу фотоґрафийох Андреи Новак, потим представена кнїжка поезиї „Гришка” Асї Папуґа, наступала и поетеса Тамара Хрин, ак и Иґор Горняк – Пишта хтори представел свой албум „Open mind”.
Андреа Новак зоз Коцура отримала другу самостойну виставу уметнїцких фотоґрафийох на хторей представени портети. Вона жада приказац емоциї людзох, їх роздумованя, чувства и живот хтори видно кед ше попатри до їх очох. Фотоґрафує рижни особи, даєдни з нїх єй найблїзши, алє и нєпознати, интересантни подоби.
− Любела бим ше занїмац и зоз документарну фотоґрафию, и так приказац худобство, корупцию и други рижни социялни теми. То подрозумює людзох на улїчки, а сцем зазначиц и тото цо преходнїк нє замерковює коло себе – гварела Андреа.
Млада поетеса Ася Папуґа зоз Руского Керестура, представела свою другу збирку поезиї „Гришка”. Вона гвари же кажда писня хвилька, а праве тота збирка поезиї цалосц тих хвилькох.
– Часто чуєм же мойо писанє зацмете, депресивне, алє то нє значи же я така и особа. Зоз почежкосцами през живот ше ношим так же пишем, на таки способ видам шицко неґативне зоз себе – толкує Ася.
Збирка поезиї „Гришка” ма штири циклуси, а анї єдна писня нє ма наслов. Рецензенти Асйовей кнїжки Микола Шанта, Олена Планчак-Сакач и Ваня Дула. З тей нагоди пречитани виривки з двох рецензийох. Госц на тим вечаре була поетеса Тамара Хрин з Руского Керестура. Уж є позната рускей явносци, а нєдавно почала писац и по сербски. Участвовала на конкурсу „Фестивал поезиї младих” 2014. року, у Вербаше и освоєла першу награду за поезию, у циклусу хтори ма дзешец писнї. Награда була друкованє єй власней кнїжки „Седма фарба нєба” на сербским язику.
Тамара пречитала даскельо свойо писнї зоз тей збирки. Провадзи и други конкурси, єден з нїх отримани у Новим Садзе „Сцена шицких креативних” дзе тиж освоєла першу награду. Ходзи и на трибини, стретнуца поетох, та так у Новим Пазару, у октобру того року, участвовала на стретнуцу поетох националних заєднїцох, дзе представяла руску заєднїцу.
Иґор Горняк – Пишта зоз Коцура, першираз представел албум хтори вишол як додаток младежского часописа МАК. Албум реп писньох Pišta & Reepgun „Open mind”. Їх робота и сотруднїцтво було приказане на видео знїмку у хторим представени и други хтори участвовали у тим проєкт
у. Рускей култури слабо познати таки жанр музики и мож повесц же тот албум перши хтори ма шлєбоду у виражованю. Пишта одреповал два писнї и гварел же єст вельо лаца у текстох, алє же их нє може заобисц, бо часто слова вигварени на красни способ нє доходза ґу людзом.
Того вечара у РКЦ-у було вецей людзох як звичайно на таких подїйох. Програму водзели Саня Полдруги и Александра Живкович, а тоту манифестацию орґанизовал Руски културни центер у Новим Садзе.