На нєдзелю ювилейна „Ружова заградка”

автор амар
753 Опатрене

НОВИ САД – На нєдзелю, 1. марца, у Студию М Радио Нового Саду будзе ювилейни, 25. Фестивал рускей народней шпиванки „Ружова заградка”, а свою рочнїцу Фестивал означи зоз 16 новима композициями и ревиялно-ретроспективну часцу.

Як и дотераз, орґанизатор и ґенерални покровитель Фестивалу Радио-телевизия Войводини‚ а на тот завод Фестивал ше на вецей способи враца ґу своїм и руским кореньом и початком.

Фестивал на нєдзелю будзе отворени на 19,30 г. зоз заєднїцку виставу малюнкох нашого познатого подобового уметнїка Владу Нярадия з Вербасу, з назву „Карпатски мит”, як и диґиталних принтох младей вербаскей уметнїци Кристини Ґшвенґ, з назву „Красота задуманей жени”.

Змагательна часц почнє на 20 годзин, дзе 16 нови шпиванки наших композиторох и авторох текстох виведу младши и уж афирмовани шпиваче у рускей музики, док у ревиялней часци буду виведзени 11 шпиванки хтори настали на „Ружовей заградки“ и зажили у народзе.

Найлєпшу композицию‚ текст, интерпретацию и аранжман оценї фахови жири, того року у составе Дюра Будински‚ Олена Сеґеди‚ Стефан Семянив и Микола Шанта.

Новосц же того року за найлєпшу шпиванку будзе гласац лєм публика у Студию М на гласацких лїсткох‚ як цо то було на перших „Ружових заградкох“.

Як кажди рок‚ директни пренос Фестивалу годно провадзиц на Другей програми РТВ и трецей мрежи Радио Нового Саду, односно на 100 МHz, як и на интернету – през опцию Програма на живо, дзе ше потим вибере ТВ (опция ТВ2), лєбо Радио (опция РНС3).

ПОВЯЗАНИ ТЕКСТИ