СРИМСКА МИТРОВИЦА – У Театру „Добрица Милутинович” у Сримскей Митровици стреду, 14. децембра, отримана Шветочна акдемия з назву „Мацери Рускинї”, як централна програма Руснацох у тим городзе, а Академию орґанизовала Подручна канцелария Националного совиту Руснацох у Сримскей Митровици.
У програми участвовали коло 50 учашнїки, а перши раз приказани и спот за шветочну шпиванку Руснацох у Сербиї „Браца Руснаци“, хтори пред даскельо роками зняло Здруженє Руснацох. З провадзеньом и оркестру „Годоба и приятелє”, домашнї Хор „Руски зарї“, з хторим руководзи музични педаґоґ Даниєла Горняк, одшпивал штири шпиванки, єдну и дзецински хор, та Надя Каурин, котра на тогорочним „Червеним пупчу” одшпивала побиднїцку композицию Даниєли Горняковей. Милда Желем Кузминац на клавиру одграла тему з познатого америцкого филму „Ловац на јелене“, у хторим ше спомина и Русинох.
Ясна Арбанас на Академиї пречитала часци поеми „Чукундїдов ошмих“ Михала Рамача, а ґимназиялки Милена Костич, Ивана Боґич и Миряна Крнїч по руски и по сербски поему „Мацери Рускинї“ Гелени Гафич Стойков, по хторей академия ноши назву. Дзеци котри пестую руски язик у ОШ „Йован Попович“ при ма Моники Абодї-Митрович вирецитовали 3 писнї, а як госц того року наступел фолклорни ансамбл КУД „Яким Гарди“ з Петровцох, з Горватскей.
На концу шицки учашнїки вєдно одшпивали шпиванку „Вратиће се роде“, а по законченю Академиї у парохийним доме грекокатолїцкей церкви за шицких отримани пригодни коктел и друженє.