БЕОҐРАД – Святочне интронизованє нововибраного архиепископа печкого, митрополита беоґрадско-карловацкого и патриярха сербского Порфирия почало 19. фебруара зоз святу архиєрейску Литурґию у Святоархангелским соборним храмe у Беоґрадзе, и од теди му сцигую числени винчованки зоз жеми и швета.
На святочносци интронизованя патриярха сербского Порфирия були предсидатель Републики Сербиї Александар Вучич, член Предсидательства БиГ Милорад Додик, апостолски нунций Лучияно Сурияни, представнїки Церквох и вирских заєднїцох у Сербиї и представнїки дипломатского кора.
Нововибрани 46. патриярх сербски Порфирий (Перич) народзени 1961. року у Бечею и на кресценю достал мено Првослав. Як написане на сайту СПЦ, основношколске образованє здобул у Чуроґу, а Ґимназию „Йован Йованович Змай” закончел у Новим Садзе 1980. року. Студирал археолоґию на Филозофским факултету Универзитета у Беоґрадзе.
Пошвидко почал студирац и на Богословским факултету СПЦ, на хторим и дипломовал 1987. року. До чину малей схими замонашел го 1986. року, його духовни оцец, теди єромонах др Ириней (Булович), терашнї епископ бачки. Истого року, епископ рашко-призренски Павле (Стойчевич), потим патриярх сербски, рукоположел монаха Порфирия до чину єродиякона у манастире Святей Тройци у Мушутишту 1986. року. Последипмомски студиї провадзел на Богословским факултету Националного и Каподистрийского универзитета у Атини од 1987. до 1990. року. Там здобул и титулу доктора наукох 2004. року.
Нашо священїки грекокатолїки маю позитивни искуства у друженю и сотруднїцтве зоз нововибраним патриярхом Порфирийом, ище у чаше його младосци, та потераз.