НОВИ САД – Тих дньох обявене „Упутство о блїзшим ушорйованю хаснованя символох АП Войводини”, пише новосадски „Дневник”, а после того як Скупштина Войводини штредком септембра принєсла Одлуку о випатрунку и способе хаснованя символох и традицийних символох Войводини.
Упутство обявене у „Службеним лїсту АП Войводини 55/16”, ма 23 члени и подробнєйше реґулує хаснованє и викладанє застави и традицийней застави Войводини, як и гербу и традицийного гербу Войводини.
У документу наведзене и же символи Войводини нє мож меняц, анї до нїх, лєбо прейґ нїх мож дацо виписовац.
Од нєдавна, попри державней застави и застави Войводини з трома гвиздочками (хтора уведзена 2000. року), опрез главного уходу до Бановини у Новим Садзе виложена и традицийна застава Войводини, з традицийним гербом, понеже ше тоти два застави Войводини ровноправно хаснує.