НОВЕ ОРАХОВО – И у Новим Орахове Националне швето Руснацох преславене на сам дзень швета, вчера, 17. януара, на 18 годзин у Руским доме. Преслава почала зоз шветочну шпиванку Руснацох у Сербиї „Браца Русини”, хтору интерпретовали Владимир Маґоч, Женскей шпивацка ґрупа и оркестер КУД „Петро Кузмяк, а госцох и домашнїх привитал предсидатель КУД Михайло Еделински.
Ораховчаном и Руснацом з Бачкей Тополї, котри тиж присуствовали на програми швета у Орахове, швето повинчовали предсидатель Месней заєднїци Йожеф Фекеч, предсидатель Вивершного одбору Националного совиту Руснацох Желько Ковач и ораховски парох о. Владислав Рац, котри здогаднул же пред Ораховчанами того року и вельки ювилей – 70 роки од доселєня Руснацох до Орахова.
Наймладши члени Дружтва ше представели з рецитациями, а потим и старши, котри присутних през рецитал здогадли на руску историю, звичаї, народни скарб, а зоз стихами руских писательох и на богату творчосц по руски.
Цали рецитал бул преткани з нїтками руских шпиванкох, у виводзеню Тамбурового оркестру КУД, Женскей шпивацкей ґрупи и солисту Владимира Маґоча.
Програма закончена з нєформалну „гимну” Руснацох у Орахове, шпиванку „Кед зме були у Чику”, а по програми отримани коктел, на хторим, як и на програми, присуствовали представителє цивилних здруженьох з Орахова, приятелє и почитователє Руснацох, як и други жителє Орахова.
