КУЛА – На своєй вчерайшей схадзки Општинска рада (ОР) Кула прилапела Ришенє о звекшаню цени за воду и канализацию, так же вода за пице будзе драгша за 10 одсто, а канализация за 41,9 одсто. Як у мено шицких штирох комуналних подприємствох у местох општини на схадзки гварел директор кулского „Комуналцу” Дамян Милянич, цена води и далєй найнїзша у одношеню на сушедни општини, а услуга за канализацию будзе драгша пре ускладзованє цени з вербаску општину, пре повязованє Општини Кула на пречисцовач у Вербаше.
ОР вчера прилапела звити о роботи за прешли рок явних подприємствох „Завод за вибудов” Кула, „Руском” у Керестуре и „Комуналєц” у Кули, одлуки о розподзельованю їх добитку, як и звити о роботи Народней библиотеки Кула и Општинскей орґанизациї Червеного крижу.
На схадзки перше розришени, а потим меновани нови члени Штабу за позарядово ситуациї Општини, так же по функциї на чолє Штабу Перица Видеканїч, предсидатель Општини Кула, його заменїк Кароль Валка и заменїк предсидателя Штабу, а за предсидателя Општинского совиту за здравє вибрани Владимир Павков, началнїк Општинскей управи Кула.