Отворени и пошвецени обновени просториї у Лєтнєй владическей резиденциї

автор влдї
1.1k Опатрене

ШИД – У Шидзе вчера отворени и пошвецени обновени простори у Лєтнєй владическей резиденциї, дзе з донациї Бискупскей конференциї Италиї и Каритасу Италиї реновирани просториї хтори хаснує Предшколскa установa (ПУ) „Єлица Станивукович-Шиля“. Пременєни облаки и дзвери, ушорена кухня и санитарни ґузел, а поставене и сучасне патосне зогриванє. Ґу тому, локална самоуправа ше остарала за кладзенє нових таркет-патосох.

Шветочносц була на вчерайше швето Покров Богородици по юлиянским календаре, так же почала з Молебеном до Пречистей Дїви Мариї у церкви Преображеня Господнього, хтори служел апостолски еґзарх за грекокатолїкох у Сербиї владика Георгий Джуджар. Сослужовали о. Владислав Варґа, о. Дарко Рац, о. Владимир Еделински Миколка и домашнї парох о. Михайло Режак.

На богослуженю, а потим и на прес-конференциї, владика подзековал донатором за участвованє у обнови просторийох у Лєтнєй владическей резиденциї – Бискупскей конференциї Италиї, „Каритасу“ Италиї и локалней самоуправи, котри препознали значносц того будинку, же би служел за потреби вирних и людзом у потреби, маюци у оглядзе и миґрантску кризу хтора на тих просторох тирва вецей як рок.

Даниєле Бомбарди спред Бискупскей конференциї Италиї и Каритасу Италиї гварел же порушуюци мотив за укладанє до обнови Резиденциї була праве миґрантска криза, з мотом „Бул сом странєц, и прияли сце ме“, та же, окрем волонтером, реновирани будинок будзе на хасен и за други потреби хтори уж запровадзени у тим будинку.

Слова подзекованя на конференциї за медиї виповедли и директор Каритасу Сербиї о. Владислав Варґа, член Општинскей ради Шид Драґан Ґутич, началнїк Општинскей управи Шид Ромко Папуґа, директорка ПУ „Єлица Станивукович-Шиля“ Ясмина Варґа и Елемир Джуджар, спред Каритасу Апостолского еґзархату за грекокатолїкох у Сербиї.

З пригодну молитву у реновираних просторийох апостолски еґзарх кир Георгий Джуджар пошвецел обновени просториї, а потим дзеци з ПУ виведли кратшу програму у хторей шпивали, танцовали и рецитовали.

Тиж наступел и шпивацко-музични трио КПД „Дюра Киш“ зоз Шиду – Наташа Еделински Миколка, Михаел Ґовля и Далибор Болдиш, котри одшпивали два руски народни шпиванки..

Директорка шидскей ПУ Ясмина Варґа подаровала малюнки кир Георгийови,  Даниєлови Бомбардинийови, о. Владиславови Варґови и Елемирови Джуджарови, а на

концу шветочносци присутни и порозпатрали обновени просториї.

ПОВЯЗАНИ ТЕКСТИ