МИКЛОШЕВЦИ – У Дружтвеним доме у Миклошевцох всоботу, 16. мая, госцовала драмска секция КУД „Яким Гарди” зоз Петровцох зоз комедию „Кров понад главу” Сави Шкубича.
Миклошевскей публики ше представел подмладзени ґлумецки состав у хторим ше находза штредньошколци зоз нєвельким ґлумецким искуствийом. Радує факт же ше драмска дїялносц у Петровцох нєпреривно предлужує и же млади маю дзеку участвовац у єй роботи.
Було то пияте виводзенє того фалату у прекладу и режиї Томислава Раца. Ришованє важного животного питаня за младу пару – пренайсц свой кров понад главу тема представи котра часто трапи младих людзох. Ношаци улоги Петра и Мери бавели Даниєл Вашаш и Мая Рац. Як сушедово зявели ше Кристиян Медєши, Денис Гарди и Боян Кошутич. Директора бавел Антун Гарди, а заняту у СИЗ-у за додзельованє квартельох бавела Таня Гарди.
Госцованє младих петровских аматерох було успишне, лєм чкода же ше представу бавело пред барз малим числом Миклошевчаньох.