НОВИ САД – Вовторок, 29. януара, у „Младежским центру ЦК13” (Войводи Бойовича 13) у Новим Садзе госц бул сучасни українски автор Андрий Любка зоз Ужгороду.
Андрий Любка бул у януаре госц Крокодиловей резиденциї за писательох у Беоґрадзе, та на госцованю у Новим Садзе о своїм живоце, путованьох и интересантних дожицох як и о своєй творчосци и сучасней українскей литератури бешедовал на сербским язику. Окреме було слова о його роману „Карбид” (2015), понеже автор наявел його преклад на сербски, а було слова и о роману „ Твой попатрунок Чо Чо Сан” (2018). Модератор вечара бул редактор литературней програми ЦК 13 Дьордє Майсторович.
Андрий Любка познати млади поета, прозни писатель и есеїста, народзени 1987. року, а українски язик и литературу дипломовал на Универзитету у Ужгороду и на балканских студийох на Универзитету у Варшави. Обявел вецей кнїжки поезиї, есейох, роман, збирку кратких приповедкох, а достал и вецей значни награди. Преклада зоз сербского, горватского, анґлийского и польского язика. Редактор є двох фестивалох поезиї.
