БАЧКА ТОПОЛЯ – Предсидатель Вивершного одбору Националного совиту (НС) Руснацох Желько Ковач и координаторка Подручней канцелариї (ПК) НС у Новим Орахове Татяна Дудаш вчера нащивели Општину Бачка Тополя, дзе з предсидательом Општини Ґабром Кишлиндером бешедовали о актуалних проблемох у информованю по руски у тей општини, як и о финансованю ораховскей ПК НС.
Понеже под час нєдавней нащиви представительох НС ПК у Новим Орахове винєшене же нови власнїк локалного медию емитує лєм репризи скорейших емисийох по руски, предсидатель Општини потримал суґестию представительох НС Руснацох же би ше обновело порядне емитованє радио и ТВ емисийох и по руски, дознава Рутенпрес од Желька Ковача.
Ґу тому, як порадзене на вчерайшей схадзки, а и на основи писменей вимоги з НС Руснацох, тих дньох Општина Бачка Тополя уплаци вєдно 50 000 динари ПК НС у Новим Орахове, цо пенєж опредзелєни за роботу тей ПК з буджету Општини за прешли и за тот рок – по 25 000 динари.