НОВИ САД – Делеґация Рускей матки (РМ), у хторей були предсидатель Матки Дюра Папуґа, заменїк предсидателя Миломир Шайтош и портпарол РМ и предсидатель Комисиї за историю Шветового Конґресу Русинох/Руснацох/Лемкох проф. др Михайло Фейса, штварток, 3. децембра, нащивела Матицу сербску (МС).
О можлївосцох сотруднїцтва представителє РМ бешедовали з предсидательом МС проф. др Драґаном Станичом, подпредсидательом проф. др Бранком Бешлином и ґенералним секретаром МС доц. др Дьордьом Дюричом. Спатрени и можлївосци заєднїцкого наступу двох маткох у рижних акцийох, манифестацийох и програмох у Републики Сербиї и иножемстве, як и у заєднїцким апликованю до европских фондох за проєкти у хторих два матки маю дорушуюци точки.
У началє порадзене же би ше виробело напрямки и план длугорочнєйшого сотруднїцтва МС и РМ, з наздаваньом же ше до того сотруднїцтва уключа и матки других националних меншинох, як цо то бунєвска, словацка, а чолнїки РМ представительох МС поволали и на преславу 25-рочнїци РМ, хтора будзе 20. децембра у Руским Керестуре.
