ШИД – На соботу и нєдзелю, 1. и 2. октобра, у Шидзе будзе перши Медзинародни мултижанрови фестивал руского филму „Русин Филм Фест”, хтори орґанизує Реґионални одбор Рускей матки (РМ) за Срим у Шидзе, а у рамикох активносцох Шветового конґресу Русинох/Руснацох/Лемкох (РРЛ) и його Шветовей ради, як и активносцох РМ у Сербиї.
Як заплановали орґанизаторе, „Русин Филм Фест” кажди рок будзе мац окремну тему, а перши Фестивал пошвецени РРЛ у Першей шветовей войни.
Фестивал на соботу будзе отворени на 15 г. у Културно-образовним центре з ретроспективу 8 филмох, а у цалосци будзе приказани филм „Траґедия Галицкей Руси”, автора и режисера Алексея Денисова з Русийскей Федерациї.
На нєдзелю, 2. октобра, тиж на 15 г., у КПД „Дюра Киш” будзе Трибина з тему „Руснаци/Русини/Лемки у Першей шветовей войни”, после того буду приказани 2 филми, а обидва днї будзе орґанизована и културно-уметнїцка програма.
Перши Медзинародни мултижанрови фестивал руского филму „Русин Филм Фест” будзе отримани з финансийну потримовку Општини Шид и Покраїнского секретарияту за културу, явне информованє и одношеня з вирскима заєднїцами АП Войводини.