НОВИ САД – У просторийох Руского културного центру вчера, 17. януара, отримана пригодна програма з нагоди означованя Националного швета Руснацох у Републики Сербиї.
Програма почала зоз интонованьом гимни Републики Сербиї и рускей шветочней шпиванки „Браца Русини”, а потим присутних у сали привитал предсидатель Националного совиту Руснацох Борислав Сакач. Винчуюци швето, гварел же нашо швето означуєме дванасти раз и наглашел же зме на тих просторох скоро три вики и же ше наздава же ту останєме голєм ище тельо часу.
Народна посланїца у Народней скупштини Републики Сербиї Олена Папуґа, у своєй винчованки надпомла же ше нам удало зачувац виру и язик, гоч нас вше менєй. Прето зачуване у наиходзацим чаше будзе на велькей спокуси и на вельким тесту.
У пригодней програми наступели Кристина Ковач, хтора рецитовала писню „Браца” поети Янка Фейси, а потим Йован Живкович, рецитатор и ґлумец пречитал пригодни текст за Националне швето хтори написал др Яков Кишюгас. Млади пияниста Саша Загорянски з тей нагоди одграл Етиду Франца Листа, а ґлумец Йован Живкович интерпретовал текст „То єден калап зоз сказки” хтори написал Владимир Балащак.
На концу програми Хор РКЦ и парохиї св. апостолох Петра и Павла „Гармония” одшпивал два писнї – „Били орґони” и „Мила моя”. Хор на гармоники провадзел Давор Сабо.
На преслави Националного швета Руснацох у Републики Сербиї у Новим Садзе присуствовали новосадски парох о. Юлиян Рац, директорка Заводу за културу войводянских Руснацох Анамария Ранкович, директор НВУ „Руске слово” др Борис Варґа и велї други Новосадянє.