СТРАЗБУР – По представяню Акцийного плану Сербиї за национални меншини у Европским парламенту, министерка державней управи и локалней самоуправи Ана Брнабич виявела же Сербия приклад добрей пракси кед слово о националних меншинох и же тото вше треба наглашовац.
Вона Аґенциї Танюґ вчера гварела же Сербия „найкултурнєйша” жем у Европи и же, кед слово о националних меншинох, предводзи у одношеню на други жеми.
По єй словох, у Сербиї єст 26 национални меншински заєднїци, од котрих 21 направела свойо национални совити, а постоя и институциї котри ше виключно занїмаю з витворйованьом правох националних меншинох.
Додала же у Сербиї у 42-ох єдинкох локалней самоуправи у службеним хаснованю 11 розлични язики. Ту и Републични совит за национални меншини, з котрим предшедує премиєр Сербиї Александар Вучич и то доказує и важносц того питаня за Сербию, наглашела министерка Брнабич.
Попри министерки Брнабичовей, на вчерайшим представяню Акцийного плану Сербиї за национални меншини у рамикох Поглавя 23, як прикладу добрей пракси у Сербиї, у Европским парламенту була и шеф Прегваряцкого тиму за приступанє Сербиї ґу ЕУ Таня Мищевич.
– Достали зме оцену же имплементация Акцийного плану барз задоволююца и то и далєй так муши остац. Тот План состойна часц Поглавя 23 и кед придаваме звит Бриселу, придаваме го у контексту имплементациї того плану – гварела Таня Мищевич.