БЕОҐРАД – Припадносц одредзеней меншинскей заєднїци найбаржей приходзи до вираженя у обласци образованя и обезпечованя роботи, а подзелєнє медзи припаднїками векшинского и меншинских народох найобачлївше при младих, визначене на сходзе о мултикултуралносци, хтори пондзелок, 23. марца, отримани у Беоґрадзе, у орґанизациї Мрежи за интеркултуралносц.
Посланїца у Скупштини Сербиї Аида Чорович гварела же стан у мулитикултуралносци вельо лєпши як у других обласцох Сербиї, та дала приклад же пред виберанками за национални совити националних меншинох войводянски медиї мали дебати, а медиї у других часцох то нє мали. Деполитизация националних меншинох нєзаобиходна тема кед слово о тих целох, та ше и на тим сходзе бешедовало же су под уплївом политичних странкох, преноши аґенция Бета.
Проблем же векшински и меншински заєднїци жию єдни коло других, а нє вєдно, гварел представитель Центру за реґионализем Александар Попов и указал на препущеня держави, хтора углавним нє реаґує на напади на припаднїкох националних меншинох.
Гоч єден з приоритетох проєкту Декади Ромох то обезпечованє можлївосцох за образованє и злєпшованє положеня Ромох, координатор Лиґи за Декаду Ромох Осман Балич гварел же мало хто сце анґажовац аж и високообразованих припаднїкох тей меншини и визначел же вше обачлївша мержня ґу припаднїком ромскей заєднїци.