СЛОВАЦКА – Нєшка и на нєдзелю, 4. децембра, у вецей местох прешовского краю у Словацкей будзе отримана популарна манифестация „Шпиви мойого роду”, хтору штернасти рок орґанизує Русинска оброда Словацкей, а з потримовку Уряду Влади Словацкей прейґ програми „Култура националних меншинох”.
Як пише лем.фм, „Шпиви мойого роду” нєшка почню у Медзилаборцох з наступом и квалификацийним змаганьом дзецох-шпивачох, а подобни концерт за младих и старших шпивачох исти дзень будзе у Радваню.
Ґала концерти, односно финални наступи шпивачох на нєдзелю буду перше пополадню у Красним Броду, а вец и вечар у Доме култури у Медзилаборцох.
„Шпиви мойого роду” єдна з найпопуларнєйших културних акцийох Русинскей оброди у Словацкей, на хторей з русинскима народнима шпиванками наступаю уж доказани, алє и нови млади шпиваче, так же є, попри пестованя русинскей шпиванки, источашнє и жридло за находзенє нових шпивацких талантох.
Фестивал ше кажди рок отримує у других местох.