Толває медзи вельку милу фамелию

автор борис варґа 24. марец 2018

Тото чого шицки ми мушиме буц окреме свидоми, то же и медзи „нашима людзми” вше єст тих котри порихтани очкодовац других пре свой хасен. Анї єден поєдинєц, и анї єден народ нє имуни на крадошох – гвари дипломовани официр полициї Яким Дудаш.

Крадзи котри ше остатнїх рок случели на руских манифестацийох и пробох у Шидзе, Новим Садзе и Суботици отворели питаня безпечносци на руских фестивалох публики, а окреме тих цо участвую.

Перша крадза котра одгукла у рускей явносци була прешлого лєта на Мелодийох руского двору у Шидзе. Пре подлу хвилю манифестация прешлого септембра отримана у Словацким доме, а учашнїки охабяли свойо особни ствари у Лєтнєй владическей резиденциї. У таких позарядових условийох, даєдним учашнїком нєстал телефон и пенєж. Случай ше нє приявйовало полициї.

У Руским културним центре у Новим Садзе, концом прешлого року под час єдней з пробох фолклору 5–6 ветераном з бутєларх нєстал пенєж. Полицию ше тиж нє волало. Найгласнєйше одгукла информация о крадзох початком рока на Националним швету Руснацох у Суботици.

НАЙВАЖНЄЙШЕ ЧУВСТВОВАЦ ШЕ БЕЗПЕЧНО

Окончователька длужносци директорки Заводу за културу войводянских Руснацох Анамария Ранкович, котри бул медзи главним орґанизаторами националного швета, гвари же крадзи на одредзени способ руцели цинь на квалитетно пририхтану святочну академию у Суботици. Вона гвари же ше таки нємили инциденти случовали и скорей, алє же ше тераз по першираз вецей людзох явело, прето Завод ришел одлучно реаґовац.

Директорка Заводу за културу войводянских Руснацох толкує же под час збуваньох окраднути пейц особи – двойо госци и тройо учашнїки. Нєпознати особи им зоз кишенкох и ташкох вжали пенєж (виняти зоз бутєларох). Покраднутим двом госцом особни ствари були у голу, дзе ше находзел етно стол. Тройо учашнїки покраднути у преблєкальнї.

– Дахто ше нам явел директно, а дахто прейґ свойого Фейсбук профилу. Пондзелок после швета, кед зме позберали шицки информациї, обрацели зме ше полицийней станїци у Суботици и написали виновну прияву. Заєднїцку виновну прияву подисали шицки очкодовани, односно окраднути, и вона послата до суботицкей полициї. Подобну виновну прияву зме послали и до Основного тужительства у Суботици – гварела Ранковичова.

У писаню виновней прияви Заводу и очкодованим помогнул Яким Грубеня, котри ма вельке искуство у тей роботи у явним тужительстве.

Ранковичова гвари же Завод превжал знїмки видео надпатраня камерох, котри ма Городска хижа и у Суботици. Знїмки нє таки квалитетни, алє дацо мож видзиц, одредзену часц простору у Городскей хижи покрити зоз камерами. Завод вжал копию, котра може послужиц як доказ, бо Городска хижа у Суботици после 10 дньох знїмки – сцера.

У медзичаше Заводу з полициї явели же нє можу прияц ґрупну прияву и же би було найлєпше кед би ю кажде окреме написал. Ранковичова гвари же ше чека одвит и зоз Тужительства, та ше поступи и по їх одлукох.

Директорка Заводу гварела же їх Установа помогнє коло писаня индивидуалней прияви каждей особи котра була очкодована на националним швету.

– Завод осудзує тоти крадзи. Нєприємно, бо ше шицки чувствуєме як єдна велька фамелия, окреме на таких подїйох и фестивалох, дзе ше шицки позбераме з вецей местох, зоз Сербиї и иножемства. У таких хвилькох любиме ше стретнуц и опущиц. Одвичательносц зоз шицких бокох и мушиме бешедовац о тим и спозорйовац… Найважнєйше нам же бизме ше чувствовали безпечно у своєй заєднїци – додала Ранковичова.

НЇХТО НЄ ДУМА НА ЕКСЦЕСИ

Дипломовани официр полициї Яким Дудаш гвари же тото чого шицки ми мушиме буц окреме свидоми, то же и медзи „нашима людзми” вше єст у тих, котри пре свой хасен порихтани очкодовац других. Анї єден поєдинєц и анї єден народ нє имуни на толвайох. Так анї Руснаци.

– Кед ше орґанизує манифестация културного характеру, вец нїхто анї нє дума о даякей нєкултури, або даяких других ексцесох. Нам, як меншини, бриґа орґанизовац и саму манифестацию, як пре нєдостаток людства, учашнїкох и орґанизаторох, так и пре проєктне финансованє котре нам тераз надрилєне як терху. Кед бизме до того шицкого ураховали ище и професийни аспект безпечносци на самей манифестациї и коло нєй, трошки такого анґажованя би були вельки финансийни видаток, за котри сом нєсиґурни же наша заєднїца може видвоїц за даєдну манифестацию котру орґанизує у своїх и так скромних условийох – гвари Дудаш.

Вон додава же орґанизаторе таких сходох, у зависносци од своїх финансийних средствох, затераз малу увагу пошвецую питаньом безпечносци. Свойо гришки, нажаль, можу обачиц аж по законченю самей манифестациї и можу учиц лєм на основи орґанизацийного искуства. Официр полициї Дудаш гвари же при озбильному приступу у ришованю таких, або подобних инцидентох, требало би пред самим случованьом найсц ришеня потенцийних проблемох, а котри би були видлїви у даякей анализи пред отримованьом явного сходу. Медзитим, вон нєсиґурни же дахто од орґанизаторох ма таки приступ ґу орґанизациї, котри, правда же вимага вецей часу, алє з котрим орґанизатор напредок порихтани на можлїви проблеми.  

– Же би ше убудуце вецей нє повторйовало таки, або подобни инциденти яки ше тераз случели, єдно од ришеньох то физично-технїчне обезпеченє котре мож анґажовац под час самей манифестациї. Таке обезпеченє ма занятих лиценцованих роботнїкох, котри научени як реаґовац у ситуацийох за котри домашнї можебуц нє порихтани. Тиж, поставена видео технїка (камери) на найкритичнєйших точкох єдно з барз добрих ришеньох. Медзитим, таки ришеня подрозумюю нє мали финансийни средства – гвари Дудаш.

2 bezbecnosc

ПОУКИ И ПРЕВЕНТИВНИ МИРИ

Окончователька длужносци директорки Заводу за културу войводянских Руснацох Анамария Ранкович гвари же найвекши проблем под час орґанизованя Дня Руснацох у Суботици було тото же Городска хижа нє ма окремну просторию за змесценє особних стварох госцох. У Городскей хижи им гварели же под час каждого явного сходу шицки ствари ше звичайно охабя у голу и же ше крадзи ридко случую.

Медзитим, Ранковичова гвари же ше убудуце будзе мушиц одвоїц єдна простория и анґажовац людзох, котри буду чувац особни ствари – як учашнїком, так и госцом. Треба розвиц свою систему безпечносци, алє ше муши и наглашовац людзом же треба же би мерковали на свойо ствари.

Фаховец з обласци безпечносци Яким Дудаш тиж дума же орґанизаторе руских манифестацийох муша часточно ришиц проблем безпечносци, окреме материялних стварох самих учашнїкох котри под час наступу охабени без надпатрунку, зоз задлужованьом особох од довирия (без огляду на фах). Гоч би ше на даяки способ и вишло зоз законских предписаньох и по власней инициятиви орґанизатора превжало мири превенциї, з цильом же би и таке ришенє зопарло толвая у його намири. Окрем того, кед же простор дзе ше орґанизує манифестацию дава можлївосц чуваня особних стварох у такволаних ґардеробох котри под надпатрунком – вец вшелїяк же и тоту можлївосц треба вихасновац.

У остатнїх случайох найвецей страдали учашнїки, котри на бину нє можу винєсц свойо ствари. Дудуаш гвари же мета толвайох и публика. И вони треба же би з боку орґанизаторох були спозорени на толвайох, цо насампредз мож поробиц зоз надписами и сличками на таблїчкох, поставених на самим уходзе. Проблем котри ше случел у Суботици охабени одвитуюцим орґаном власци же би го ришовали по дньовим шоре. Лєм же, нажаль, часто ше зна случиц же праве тота власц, котра найвисша и од котрей обчекуєме найвецей резултати – пороби найменєй. Праве прето, лєпше превжац превентивни мири, як ше пасовац зоз процесом репресиї.

СВИДОМОСЦ О БЕЗПЕЧНОСЦИ

Инциденти и проблеми з крадзами ше, окрем на манифестацийох, случую и у каждодньовим живоце. Кед би ше превжало мири подзвигованя свидомосци же наш рухоми и нєрухоми маєток власна ствар, и же кажди поєдинєц за ньго одвитує и ма обовязку старац ше о нїм, без огляду чи є на явним месце чи нє, з таку популацию публики и учашнїкох самим орґанизатором би було олєгчане отримованє явного сходу. Таке освидомйованє часц основного образованя и култури.

– Култура ше муши вибориц за свойо место. Нє шмеме допущиц же би нам таки проблеми ощербели учашнїкох, або публику. Зоз осторожнєйшим приступом шицких нас, наздавам ше же убудуце инциденти такого типу останю лєм бляде здогадованє – гвари Яким Дудаш.

Вон додава же кед би ше и убудуце повторйовали подобни ситуациї, на домашнїх ше стої же на яки способ обезпеча сиґурносц своїм учашнїком же би нє страцели їх довириє.

(Опатрене 399 раз, нєшка 1)