Дипломи и награди за нови драги

автор рим 17. юлий 2018

На концу осмей класи достац Вукову диплому значи у свидоцтву о законченей основней школи мац вше лєм петици. Каролина Гардийова зоз Нового Саду од першей по осму класу у Основней школи „Петефи Шандор” вше була цалком одлична, алє вона посцигла и вельо вецей од того, о чим шведоча дипломи о успихох посцигнутих на змаганьох зоз велїх предметох.

Дома одмалючка з мацеру приповедала по мадярски, а з оцом по руски, та єй обидва язики мацерински, єднак блїзки. У оводи перше була у сербским оддзелєню, а вец у мишаним, дзе ше бешедовало по сербски и по мадярски. Кед виросла за школу, родичи ю уписали до мадярского оддзелєня у Школи „Петефи Шандор”, гоч вельо блїжей мала три школи, алє на сербским наставним язику. Од першей класи поряднє ходзела и на годзини руского язика як виборного предмету, а гоч у цалей школи лєм вона була приявена на грекокатолїцку виронауку, осем роки поряднє, вєдно зоз рускима школярами зоз других новосадских школох ходзела на тоти годзини. Седем роки була член дзецинскей фолклорней секциї у Руским културним центру у Новим Садзе и наступала на велїх манифестацийох, смотрох, госцованьох… Ґлумела и у театралней бабкарскей представи „Судзенє домашнїх животиньох”. Од пиятей класи ходзела на змаганя з руского язика. У седмей класи на Медзиокружним змаганю була перше, на Републичним друга, а у осмей класи на обидвох змаганьох Каролина завжала перше место. Прешлого року була у Лєтней школи у Попраду у Словацкей.

Успишна була и на змаганьох зоз сербского як нємацеринского, та у седмей класи на Републичним була треца, а у осмей на обидвох змаганьох друга. Зоз мадярского язика у пиятей класи на Медзиокружним була перша, та сцигла и на Републичне змаганє. Добре ше спорозумює и по словацки и по польски, а у школи як странски язики учела анґлийски и нємецки. Барз люби читац кнїжки по нємецки. Язики єй ширели круг приятельох, алє и указали драгу за дальше школованє. Положела примаци испит у язичней ґимназиї у Сримских Карловцох, и тераз нєсцерпезлїво чека дзень кед ше упише до тей школи. Хтори странски язики окрем тих цо уж учела, там будзе мац можлївосц научиц, ище нє зна. Зоз ученьом телїх язикох здобула вельке богатство, а нїч нє страцела же основну школу закочела по мадярски. И влонї, и того року, за посцигнути успихи у школи достава Видовданску награду.

Каролина люби путовац. Була у Горватскей, Словениї, Македониї, Греческей, Италиї, Словацкей, Польскей и у Мадярскей, а барз би сцела пойсц и на Малту. Можебуц ше єй укаже нагода у черанки ґимназиялцох нащивиц и тоту жем. 

(Опатрене 90 раз, нєшка 1)