КЕД СНИ ПОСТАНЮ РЕАЛНОСЦ

автор цецилия надь, фото: Кока Кола 25. децембер 2019

Музика представя єден чаривни швет словох и нотох, кажде зоз нас ма одредзени смак и ужива у своїм вибраним музичним стилу. Дахто слуха свою облюбену ґрупу и препущує ше музики, дахто пойдзе на концерт облюбеней шпивачки, а дакому ше поспиши и зняц писню и спот зоз облюбену ґрупу. Так почина авантура Марини Роман зоз Руского Керестура, хтора сотрудзовала и зняла дуетску писню „Волимо се више” зоз ґрупу С.А.Р.С. на музичним змаганю „Discovered by Coke” хторе орґанизовала компания Кока-Кола.

Марина гвари же єй мотив за приявйованє на тото змаганє була праве ґрупа С.А.Р.С., на їх инстаґрам профилу и видзела же вони буду єдни од менторох, та похопела же то єй єдина нагода же би их упознала.

– Любим їх писнї и музику, а на тим змаганю представела сом ше зоз шпиванку „Буђав лебац”, кажду писню хтору шпивам, шпивам так як мнє понєше, здумуєм свойо даяки украси. Праве тото ше и пачело С.А.Р.С. ґрупи, була сом сама своя и указала якуш енерґию, як ме чули, гварели же то є то, ти наша, ти идзеш далєй – здогадує ше Марина самого початку.

Змаганє почало у септембру, а за менторох попри ґрупи С.А.Р.С. змагателє могли виберац ище помедзи Сару Йо, Бояну Вунтуришевич и Леоном. Початком октобра мешаца, Марина дознала же вошла до узшого круга змаганя и же их од 200 кандидатох, остало 13.

 

ПОЛУФИНАЛЕ ЯК ЗОГРИВАНЄ

Шицки полуфиналисти у Беоґрадзе мали орґанизовани тродньови „boot” камп. Перши дзень ше упознавали зоз менторами, и исти тот дзень мали преподаваня у Комбанк дворани. Наша собешеднїца толкує же ше дотхли вецей конарох у музичней индустриї, та так преподаваня тримали продуценти з „Bassivity” музичней хижи, писателє текстох, шпиваче, ґлумци, та аж и орґанизаторе Еґзиту.

– Було ми барз мило же шицки гуторели же треба буц свой, же ше нє треба меняц, тиж, останє ми у паметаню, же гоч яки су познати, видно же любя тото цо робя, єдноставно кед любиш шпивац, писац музику, ґлумиц то наисце видно. Вельки упечаток охабели и слова же на даяки способ ми будземе познати, будземе мац векше провадзенє з боку других, и тото треба вихасновац лєм на добре, бо нас провадза и дзеци, и старши, гуторели нам же бизме ширели позитивну енерґию, позитивни теми и же бизме ше нє хвалєли зоз тим цо маме, алє же би зме указали цо поента того цо робиме. Потим ушлїдзела и догварка зоз менторами за полуфинални наступ. Кажди ментор зоз свою ґрупу ишол до студия, двоме колеґове и я, зоз нашим ментором, з ґрупу С.А.Р.С., зняли нашу верзию „Буђав лебац”. Тот исти вечар зме ше дружели, шпивали, нащивели зме студентски парк, и там уживали, грали рижни писнї – од страних по домашнї. Треци дзень було полуфинале, ушлїдзело беганє, шминканє, фризури. Вечар було змаганє, и барз ми було мило же зме ше потримовали медзисобу, наисце сом нїч нє обчековала. Кед мойо менторе преглашели же вибераю мнє же бим вошла до финалу, я була у шоку, у смислу „Ви озбильни?” и як сом вишла на бину, питала сом ше главному шпивачови Жаретови чи су сиґурни, и вон ми нормално, потвердзел же гей – толкує финалистка Марина.

 

УКАЗАНЕ ДОВИРИЄ И ШЛЄБОДА

После полуфинала шицким финалистом оможлївене знїмац писню и видео спот зоз менторами, а наша Марина зняла писню „Волимо се више” зоз ґрупу С.А.Р.С. Вона гвари же мала свою шлєбоду, та кед достала готову матрицу, часц дзе вона шпива охабена празна, достала текст, а шпивац могла як сцела.

– Думам же сом им ше попачела пре иншаки стил, пре глас, а и енерґетски зме ше повязали. Достала сом огромну потримовку, кед зме зняли писню, гварели ми же сом скромна, и най останєм така, алє дали ми кридла за далєй, и же бим ище баржей указала тото цо знам – гвари Марина.

Исти дзень кед ше знїмало писню, знїмало ше и видео презентацию дзе ше кандидати представяли.

–  Барз ми ше пачел способ на хтори зняти тот видео, барз опущено. Нє навикла сом приповедац же гласайце за мнє, або таке дацо, алє я то погуторела шицко на свой способ, и пачел ми ше сам процес. Як и видео презентация, так и знїманє споту прешло супер и опущено. Нє було ми чудне, бо зме знїмали и скорей, зоз Арию, алє тераз було на вельо висшим уровню, професионалнєйше цо ше дотика шминки, облєчива. Спот зняти у кафичу, алє кафич напущени, стари, нароком така естетика вибрана – приповеда Романова.

Писня зняата за ширшу явносц и доступна є и на ютюб. Марина гвари же нє роздумовала вельо у тим напряму, алє през цале тото искуство нє була свидома шицкого цо ше случує.

– Щиро, мнє найважнєйше тото цо думаю мойо найблїзши, так же, трема вше найвекша кед треба наступац пред свою публику и тот финални наступ кед бул, нє мала сом трему алє сом знала же мойо ту и мушим указац и дац шицко од себе, же бим их нє розчаровала – припознава наша финалистка.

 

САМЕ ФИНАЛЕ ЛЄМ БОНУС

Финалне змаганє отримане 15. новембра у Старим ганґаре у Беоґрадзе. Марина о конкуренциї нє роздумовала вельо, прето же ше шицки финалисти барз зблїжели, а на самим финалним змаганю участвовали и полуфиналисти, та ше шицки вєдно дружели, цо на нашу младу гвизду охабело вельки упечаток.

– Нє обчековала сом же победзим, шицко цо сом сцела и жадала, шицко сом достала, у моєй глави я уж победзела, сцела сом упознац ґрупу С.А.Р.С, а гевто шицко то бул лєм бонус, дарунок. Знала сом же будзем мац потримовку, алє анї кус же нательо и так. То було цошка нє реалне за мнє. Очарована сом и зоз „Сту(пи)дентами” же ше дали до акциї, же яке ми мале место, алє зложна заєднїца, то и С.А.Р.С. гварели, шицки були одушевени зоз мою публику, вони мали барз добру енерґию и я би нє була така опущена да вони нє були там, мала сом кому шпивац. Вецей як 40 людзе пришли на автобусу зоз Керестура и були моя публика. Велї ми явели же чули нашу писню на радию, я ю ище нє чула, алє мило ми – заключує Марина.

Романова студентка на Анґлистики, на Филозофским факултету у Новим Садзе, дзекуюци музики и полюбела анґлийски.

– План таки же би ше и музика и факултет отримали. Сцем писац и свою музику, а як и С.А.Р.С. гварел, робиц шицко зоз шерцом, бо вец любов чиста, а то людзе видза и чувствую – заключує Марина.

 

(Опатрене 24 раз, нєшка 1)