Ювилейни 20. Еґзит будзе отримани

автор Л. Костелник 30. май 2020

Тогорочни фестивал требал почац у сушедней жеми, у маю, у Умаґу. Прето, пол милионa нащивительох ,,скокли” до горватского приморя прейґ интернета дзе наживо провадзели штири ноци Sea Star Stream Festival. У цеку реґионалного стриминґ фестивала, од 21. по 24. май на официйних бокох фестивала, були емитовани шеснац концерти хтори зняти од 2017. по 2019. рок на Addiko Tesla бини и Nautralis Арени.

НОВИ ТЕРМИН ОД 13. ПО 16. АВҐУСТ

Як цо уж наявели на официйним интернет боку Еґзита, фестивал ше нє отрима у предвидзеним термину у юлию у своїм штиродньовим формату од 55.000 нащивительох дньово на вецей як 40 бинох и зонох ширцом Петроварадинскей твердинї. Медзитим, з оглядом на тото же злєпшана здравствена ситуация у держави и у реґиону, кризни штаб и Влада Сербиї одлучели же би ше фестивал нє одказало, алє же би ше го орґанизовало од 13. по 16. авґуст. Орґанизаторе свидоми и порихтани на менши капацитет и огранїчену публику хтора од снованя була шерцо енерґиї Еґзита.

ЧИ ШЕ ВИ РИХТАЦЕ?

– Кед будзе отримани фестивал, вшелїяк пойдзем голєм єден дзень, бо жадам почувствовац тоту еуфорию. Нє обавам ше. Наздавам ше же будзе отримани у предвидзеним термину. Думам же будзе менєй нащивени и же найбаржей буду хибиц госци зоз Британиї, Италиї и Шпаниї. Тиж думам же даєдни гвизди сиґурно нє приду, поготов тоти найпознатши – гвари Оливер Гарди зоз Дюрдьова.

– На Еґзиту сом бул першираз прешлого року, мушим припознац же барз добре искуство пойсц на таки фестивал. Цо ше дотика тогорочного Еґзиту, бешедовал сом зоз товаришами о нїм, алє нїч на ,,твардо”. Вшелїяк, любел бим пойсц голєм єден дзень. Було вшелїяки вариянти коло Еґзиту, алє обявене же ше отрима у авґусту, лєм з меншим числом нащивительох як цо було прешлих рокох. Нє барз сом випровадзел же чи шицки поволани гвизди приду, алє ше наздавам же будзе як цо плановане – закончує Марко Буила зоз Коцура.

– Потераз сом була два раз на Еґзиту, а рихтала сом ше пойсц и того року. Карту ище нє мам, бо сом чекала най видзим хторого датума будзе отримани, медзитим тераз уж час же бим ю купела. Наздавам ше же приду шицки гвизди хтори жадам видзиц, алє, щиро, думам же пре тоту ситуацию у швеце, нє будзе так. Думам же того року Еґзит нє будзе таки нащивени як ше обчековало, алє тиж думам и же нє будзе менєй квалитетнєйши од прешлих рокох. Еґзит добра нагода за упознаванє нових людзох, ,,опущованє” од контролних задаткох лєбо испитох, уживанє и слуханє вшелїяких жанрох музики. Єдноставно, цошка цо треба дожиц – толкує Марина Роман зоз Руского Керестура.

– Ходзел сом давно, 2012. и 2013. року на Еґзит, а кед добре паметам, бул сом и єден дзень 2014. року. Якошик ме засицела цала тота приповедка та сом нє даяки ,,еґзиташ” же бим плановал и того року пойсц. Чул сом вшелїяки плани за тогорочни фестивал, ту уложени вельки пенєжи, верим же будзе отримани, алє як ше предпоставя, у авґусту. Можебуц буду даяки мири, а можебуц ше по тамаль ситуация и сцигша, та будзе таки яки  бул и потераз – заключує Иван Канюх зоз Нового Саду.

– Нє знам яки план  за тогорочни фестивал. Кед поведза же може присц гоч хто и як сце, та нє пойдзем, а кед будзе даяки ушорени план же як ше ма пойсц, вец можебуц и пойдзем. Скорей сом часто ходзел на Еґзит и бул сом на каждей бини, алє углавним главна бина, Dance Arena, Happynovisad и Fusion бина були приоритет – анонимни.

УХОДНЇЦУ МОЖ ВИХАСНОВАЦ И НАРОК

Шицки хтори уж купели карту за тогорочни фестивал, годни виберац чи ю вихасную того року чи нарок на Еґзиту 2021. Тоти хтори зосцу рефундацию, годни ю поглєдац у складзе з условиями хтори наша держава препише за шицки одложени збуваня пре пандемию. Тоти хтори ище нє маю карту а жадаю пойсц, ознова порушане купованє картох од першого юния, онлайн або особнє.

(Опатрене 16 раз, нєшка 1)