ДЮРДЬОВ – Шветочни концерт з нагоди 80-рочнїци од снованя Културно-уметнїцкого дружтва „Тарас Шевченко” отримани всоботу, 6. децембра. Богату програму патраче нєпреривно наградзовали з моцнима аплаузами.
На концерту у двогодзиновей програми и дзеветнац розличних точкох участвовали коло сто штерацец аматере. Наступели терашнї и дакедишнї члени, даєдни були пред дзешец, двацец, трицец, штерацец, та и седемдзешат роки активни, а даєдни и нєшка активно участвую у роботи Дружтва.
Наймасовнєша, як то у дюрьовским Дружтве обичай, фолклорна секция ше того вечара представела зоз шейсцома фолклорнима ґрупами у розличним народним облєчиве. А танцоше були од наймладших, та по шейдзешат и вецей роки. Медзи нїма були три ґрупи ветеранох, дзецинска, пририхтуюца и виводзацка фолклорна ґрупа.
Зоз шпивацкей секициї насупела надалєко припозната женска жридлова ґрупа чийо членїци були и найстарши на концерту, потим и два женски шпивацки ґрупи и єдна дзивоцка. Участвовали и солисти, шпиваче: Микола Хромиш, Марко Радишич и Михаил Рамач, и рецитаторки: Валентина Салаґ и Милица Михальовски. Фолклорни и шпивацки ґрупи провадзел оркестер Дружтва у котрим грали и ветеранє музичаре.
На шветочносци, як госц участвовало сербске Културно-уметнїцке дружтво „Бранислав Нушич” зоз Дюрдьова зоз двома танцами.
Шветочни концерт з нагоди 80-рочнїци отримани у полней спортскей гали Основней школи „Йован Йованович Змай” у Дюрдьове, а на нїм ше почувствовало позитивну енерґию нє лєм учашнїкох на бини, алє и патрачох котри без прерви провадзели учашнїкох, шпивали з нїма, клаяпкали им.
През програму водзели дакедишнї аматере Сенка Джуня и Тарас Чапко, а конферансу написали Яким Чапко и Тамара Балоґ.
Концерт орґанизовал Управни одбор КУД „Тарас Шевченко” з помоцу терашнїх и дакедишнїх аматерох, за озвученє бул задлужени Аудио Миґо и Алексей Виславски. Концерт помогли Скупштина општини Жабель, Национални совит Рускей националней меншини, Завод за културу войводянских Руснацох, Основна школа „Йован Йованович Змай”, як и поєдинци и подприємства Моника Брукнер, Тирки Транспорт – Любка Тиркайла, Иґор Чурчич, Аґрикампус доо, НС Концепт доо, Електротим доо и ЕнерґоҐлобал доо.
После програми дуженє предлужене у простроийох КУД „Тарас Шевченко” дзе ше тот значни ювилей славело до рана и дзе ше вєдно вешєлєли шицки ґенерациї, а забавяли их „Коцурски бетяре” на чойо гранє дзечнє шпивали и танцовали шицки присутни.