ВЕРБАС – У просторийох КПД „Карпати” у Вербаше на соботу, 11. фебруара, будзе отримана роботня „Кухня то школа”, на хторей буду участвовац дзеци хтори ходза на годзини руского язика з елементами националней култури, a почнє на 13 годзин.
У рамикох проєкту „Кухня то школа” концом 2021. року видата сликовнїца зоз вифарбйованку „Кухня” як 6. и 7. кнїжка у едициї „Заградка” и праве вона на соботу будзе представена школяром, хтори ше годни опробовац и у кухарских схопносцох, коштовац даєдни руски єдла, а достаню и дарунки.
Авторе писньочкох у сликовнїци Ирина Гарди Ковачевич, Агнета Бучко Папгаргаї, Силвестер Д. Макаї, Серафина Макаї, Юлиян Пап, Мелания Римар и Оксана Мудри Недич, док Мария Ковачевич авторка илустрацийох у сликовнїци и вифарбйованки.
Концом прешлого року на Ют’юб каналу Ruske slovo za dzeci обявена и музична анимация сликовнїци „Кухня”, хтору мож послухац на тим линку.
Роботня прешлого року отримана и у Руским Керестуре, Коцуре, Дюрдьове, Бикич Долу и Новим Садзе, а проєкт НВУ „Руске слово” „Кухня то школа” – кнїжки, едукациї и роботнї интеркултуралносци орґанизовани дзекуюци финансийней потримовки Буджетского фонду за национални меншини Министерства за людски и меншински права и дружтвени диялоґ Републики Сербиї.