Мирослав Мудри зоз Дюрдьова, гоч уж нє грає двацец роки, ище вше синоним за контрабас и тамбурову музику. Любов ґу музики и пестованю рускей култури нашлїдзел од оца и мацери, котри як и вон, були активни члени Културно-уметнїцкого дружтва ,,Тарас Шевченко” зоз Дюрдьова.
Мирослав почал грац у пиятей класи основней школи, пред ровно пейдзешат роками. Теди при Добродзечним огньогасним дружтве Дюрдьов у Дюрдьове, чий бул член у пионирох, учел грац на тамбурки вєдно зоз товаришами. Учел их валалски байбер и огньогашец, Дюрица Срданов. Так их анимирали же би ше млади сходзели у Огньогасним доме. У ДОД грал по осму класу, а вец зоз товаршами почали грац у КУД ,,Тарас Шевченко”. Там их учели грац Михал Лїкар и Мижо Баран. Здогадує ше Мудрийов же, док ходзели до основней школи часто грали наставнїком у зборнїци на святочних преславох. Теди бул таки обичай. По конєц осемдзешатих, гвари Мудри, людзе були веселши, гоч и теди було и бриґи, и роботи, и проблеми, заш лєм мали вельку дзеку вешелїц ше.
После вецей як пейц рокох, кед мал 18, почал грац на контрабасу. И од теди на нїм нєпреривно грал, перше у Дружтве у оркестру, а вец и у оркестру ,,Дюрдьовски тамбураше”. Од трицец рокох кельо грал на спомнутих двох инструментох, вецей як двацец роки грал на контрабасу. Грал з велїма познатима менами кед слово о тамбуровей музики, медзи хторима и Дюрдьовчанє Нестор Пушкаш Неца, Михал Лїкар и Мирослав Шовш Шоле, а з нїма и найдлужей грал. У тим периодзе були барз популарни. Мирослав ше здогадує же з нагоди Дня женох, грали цали дзень на вецей местох. Даскельо раз, док свадзби тирвали од рана до рана, грал два днї на двох свадзбох. Було чежко алє фино, бо були млади, любели музику, вешелїц ше з ню и, як гвари Мудри, шицко могли и шицко им ишло од рук. Гвари Мирослав же памета свадзбу у Гирйоватих зоз Миклошвцох у Горватскей и Дудашових у Дюрдьове. Пияток од рана до рана було вешелє у Миклошевцох, всоботу пришли по млоду Любку, и грали ознова цали дзень и ноц на свадзби.
На вецей заводи грали и у Нємецкей, у Клубу Югославянох и на балох у Минхену у орґанизациї Руснацох. У Аузбурґу бивали и грали у ресторану Владимира Синки котри родом зоз Коцура, та у Айслиґену дзе ноцовали и грали викендами даскельо тижнї за шором. Мудри найвецей путовал зоз оркестром КУД ,,Тарас Шевченко” з нїма нащивел велї держави, дзечнє грал, и за ньго то були окремни путованя. Окрем того, на вецей заводи участвовал у емисийох на руским язику, у музичней часци програми Радио телевизиї Войводини, як и у знїманю музики, тону за потреби Радио Нового Саду.
